Herriaren aktibatze eta konpromisoak ekarri du Gogorza etxera, Sareren arabera
Errenteria-Oreretako Sarek agerraldi jendetsua egin du gaur goizean, Aitzol Gogorzaren espetxeratze arindua baloratzeko. Ez dute Mikel Arrieta ahaztu.
Lourdes Urangak eta Jon MInerrek irakurri dute adierazpena.
Sarek deituta, herritar talde handi bat elkartu da gaur Koldo Mitxelena ikastetxeko jolastokian. Aitzol Gogorza presoari, hogei urteren ondoren, espetxealdi arindua ezarri diote, bere gaixotasuna dela eta. Bere etxean jasoko du tratamendua.
Modu positiboan baloratu dute urrats hori, baina Errenteria-Oreretako herritar, eragile eta instituzioek egindako lana ezinbestekotzat jo dute. “Hemendik, herritik”, adierazi dute, “erakutsitako aktibazio eta konpromisoak eman dion bultzada ezinbestekoa izan da Aitzol etxeratzeko. Bidea zaila eta luzea izan den arren, gure ezberdintasunak alde batera utziaz, bide berean, elkarlanean lan egiteko gai garela erakutsi dugu beste behin ere”.
Bide horretan modu irmoan jarraituko dutela jakinarazi dute, elkarbizitza, konponbidea eta bakea lortzeko.
Hogei preso gaixo
Bihar, apirilak 7, Osasunaren Nazioarteko Eguna dela gogorarazi dute. Horren harira, salatu dute hogei euskal preso gaixok espetxean jarraitzen dutela. “Kartzelan gaixotasunak areagotu eta sortzen dira; horregatik, gaixotasuna identifkatzerako unean, behar bezala artatuak izan behar direla gogorarazi nahi dugu”, gaineratu dute.
Gaixo dauden preso horien artean Mikel Arrieta oreretarra dago, Algeciraseko espetxean. Gaixotasun larri edota sendaezinak dituzten pertsona guztiek kalean egon behar azaldu dute. “Horregatik, Mikel Arrietaren eta gainontzeko larri gaixo dauden presoen gaixotasunak era duinak eta humanitarioetan artatzea eskatzen dugu”.
Sarek esan du bere konpromisoa dela konponbidearen agertoki justu eta iraunkor bat lortzea. “Bertan, biktima guztien sufrimenduaren aitortza eta errekonozimendua egin behar da. Horrez gain, preso guztien giza eskubideen urratzearekin amaitzea eskatzen dugu. Hau dena lortzeko, ezinbestekoa da zubiak eraikitzea”.
Aitzol Gogorzari espetxealdiaren aldaketa pozik jaso dutela berretsi dute, eta lanean jarraitzeko bultzada izan behar duela uste dute.
“Herri osoari eskerrak eman nahi dizkiogu eta egin dugun lanak fruituak eman dituela gogorarazi nahi dugu; eskerrak modu batean edo bestean zuen ekarpena eman duzuen guztioi, eragile edo elkarte guztiei”, gaineratu dute. Bukatzeko, esan dute Mikel Arrietak eta beste preso guztiek kalean egon beharko luketela.
