Maialen Oiartzabal hirugarren aldiz izan da Espainiako txapeldun
Denboraldia bukatu berri du kirolari oiartzuarrak. Balantze ona egin du, baina adierazi du ez dela erraza izan, belauneko arazoak izan baititu.
Atzo eguraldi ona egin zuen Pallarsen, Oiartzabalek domina etxera eramateko modukoa. Maialen Oiartzabal eskiatzaile oiartzuarrak hirugarren aldiz lortu du Espainiako eski akrobatikoko txapelketako urrezko domina. Aurtengoan Katalunian lortu du, Pallarseko eski estazioan.
Oiartzabalek berretsi duenez, txapelketa batera joaten denean, bere onena ematera joaten da. “Hori zen nire asmoa, eta, egia esan, ongi atera zen; gustura gelditu nintzen egin nuenarekin”, zehaztu du.
Hala ere, baldintzak ez ziren onenak entrenamendu saiorik ezin izan zutelako ia-ia egin: “Ez zen ezer ikusten, eta elur pila bat ari zuen; ezin zen saltorik egin. Atzo [igandea] egin behar izan genuen dena, eta baldintzak errazenak ez izan arren, dena ongi joan zen”.
Txapelketak, kito
Espainiako Txapelketarekin bukatu du lehiaketa denboraldia. “Europako txapelketak aurreko astean bukatu nituen, eta asteburuko honetan Espainiakoarekin bukatu dut. Orain gustatuko litzaidake egun batzuk eskiatzera joatea, lasaiago, baina ez dakit aukerarik izango dudan…”, jakinarazi du Oiartzabalek.
Denboraldiaren balantzea egiterakoan, esan du ona izan dela, baina ez dela batere erraza izan. Belaunean arazoak izan ditu, eta horrek hilabete geldi egotea behartu zuela.
Espainiako txapelketa poltsikoratu du, baina Europakoan ezin izan du garaipenik lortu: “Europan maila oso altua dago momentu honetan, eta txapelketatan ezin izan dut nik nahi nuen maila eman, baina azkenean pozik nago egin dudanarekin”.
Ranking orokorrean bederatzigarren sailkatu da, slopstyle estiloan. Big Air-en, berriz, laugarren izan da. Bere helburua, esan duenez, Top-10ean sailkatu izan da. Baita sailkatu ere.
