Ion Zabaleku Mendiburu 'Zapo' hil da
36 urterekin hil da oiartzuarra. Zabaleku informatika denda zuen, eta Itturri merkatari elkarteko presidente izan da orain arte. Hainbat saltsatan ibilitakoa zen.
Ion Zabaleku Mendiburu Zapo oiartzuarra hil zen bart, gaixotasun baten ondorioz. Askok ezagutuko zuten bere dendara ordenagailua konpontzera eraman zutelako, edo zerbait erostera joateagatik. Kastroko iturriaren ondoko txoko batean lehendabizi, Rafael Pikabea etorbidearen hasieran ondoren, Zabaleku Informatika denda kudeatu zuen. 2017ko irailean saria jaso zuen dendak: Gipuzkoako Merkataritza Bazkundeak ematen duen 10 Bitxiak Saria jaso zuten, Oarsoaldeko denda kuttunenaren sarian boto gehien lortuta.
Merkataritza txikiko sektorean lan eginda, herriko elkartean sartuta zebilen. Azkenera arte izan da Itturri merkataritza elkarteko presidentea. Lanetik harago, herriko beste hainbat saltsatan ibilitakoa zen. Adibidez, bere auzoko —Iturriozko— jai batzordean, edo ihoteetakoan. Xanisteban Eguneko sokatira txapelketan ere maiz defendatzen zuen bere auzoaren izena.
