Pilota egokituko txapela Mindararentzat
Errenteriako Mindara elkarteko Eneko Sagarmendik (Mutriku) eta Leire Esnalek (Zumaia) jantzi dute Pilota Egokituko Master Cupeko txapela. Gurpildun aulkiko finala, Joseba Lasak eta Beñat Lizasok irabazi zuten puntu bakarreko aldearekin
Bi Bikote irabazleak urdinez jantzita. Gurpildun aulkia Lasa eta Lizaso; atzean Esnal eta Sagarmendia. Errenteriako Mindara elkarteko Eneko Sagarmendik (Mutriku) eta Leire Esnalek (Zumaia) jantzi dute Pilota Egokituko Master Cupeko txapela. Bi pilotariak bikain aritu ziren eta partida hasieran nahiko berdinduta aritu baziren ere Sheila Cueto eta Iraitz Huegunek osatutako bikotearekin, azkenean 25-17 utzi zuten Beasaingo Antzizar pilotalekuko markagailua. Txapelak beraz, Mindara elkarteko Sagarmendi ea Esnalek jantzi zituzten.
Estuago joan zen gurpildun aulkiko finala. Izan ere, azken tantora arte borroka latza izan zuten kantxan pilotariek. Azkenean, Joseba Lasak eta Beñat Lizasok irabazi zuten puntu bakarreko aldearekin, 25-24, Javier Etxezarreta eta Asier Navaridasek osatutako bikotea. Mindarako pilotaria da Lizaso.
Igandean jokatu zen finala, pasa den ostegunean aurkeztu zuen Mindara Elkarteak. Elkarte horretako ordezkari Estibaliz Sagarmendik nabarmendu zuen Master Cuparen garrantzia aniztasun funtzionala duten kirolariak ikusarazteko: “Pasa den urtetik asko handitu da. Hala ere, gehiago zabaldu nahi dugu oraindik gure pilotariek aukera izan dezaten Euskal Herri osoan jokatzeko, eta indarra hartzeko. Pilotari profesionalena sustatzea ongi dago, baina pilota egokituan ari direnek ere maila oso altua dute eta partida ikusgarriak egiten dituzte”.
Pilotari horiei aukera ematera deitu zuen Mindarako ordezkariak, pilota egokituan ari direnek ere edozein frontoian jokatzeko aukera izan dezaten. Pasa den igandean jokaldi bikainak erakutsi zituzten, partida ikusgarriak eta lehiatuak izan ziren finaleko biak; gorenak, kantxan aritu ziren zortzi pilotariak bezala.
