John Berkhout taldeak "gero arte" esan du
'Izarren hautsa' abestiaren bertsioarekin eten dute —momentuz behintzat— bere ibilbidea. Bidean aurkitu dituztenei eskerrak eman dizkiete.
John Berkhout Oiartzungo taldeak “gero arte” esan du. Beren Facebook orrialdean zabaldu dute mezua, eta “gero arte” hori esateko abesti ezin aproposagoa erabili dute: Izarren hautsa.
Mirokutana ekoiztetxearen Bihar Dok Amairu filmerako landu duten bertsioa izan da beren azken kanta… oraingoz. Iñigo Goñik, Mikel Alonsok, Ekain Perezek, Gartxot Unsainek, Eneko Lusarrek eta Ander Lizasok eskerrak eman dizkiete bidean aurkitu dituzten “lagun, musikari, teknikari, kontzertu antolatzaile, zigilu, jaialdi, promotore, manager, diseinatzaile, bideo egile, argazkilari, aldizkari, irrati, familia eta beste edonori… eta batez ere gure musika entzunez zerbait sentitu duzuen guztiei”.
Bi disko
Taldeak 2013an atera zuen John Berkhout izeneko diskoa. Garai hartan indartsu jo zuen indie-folkaren olatuaren gandorrean etorri ziren oiartzuarrak, eta arrakasta handian izan zuten. Insamuel Records/ Warner Music diskoetxearekin kaleratu zuten disko hura.
Bigarren diskoa, berriz, 2016an kaleratu zuten: Bloo Mind. Taldeari izena jartzeko orduan bezala, hitz jokoa erabili zuten loraldi eta buru tristea-rekin. Kasu horretan, aurreko diskoko estiloa erabat irauli, eta krautrocka edo dreampopa bezalako estiloei toki egin zieten.
