"Pertsonen ongizatea bermatzeko" proposamenak landu ditu Lezoko EAJk
Lezoko EAJk hauteskundeei begirako programaren hainbat xehetasun eman ditu, zehazki, Gizarte Ongizate alorrari dagozkionak.
Zahartze aktibo eta osasuntsua bultzatzen jarraituko du Lezoko EAJk. Argazkia: Lezoko EAJ. Lezoko EAJk hauteskunde programarako Gizarte Politikaren atalerako Lezoko landutakoen berri eman du. Jakinarazi du bukatzear den agintaldian bezala pertsonak direla EAJren ardatz nagusia, “berdintasuna eta bizikidetza sustatzen jarraitzeko konpromisoa dugu, gizarte osasuntsuago, kohesionatuago, orekatuago, inor atzean uzten ez duena eraikitzeko”.
Jesus Mari Martiarena egungo alkate, eta EAJren alkategaiaren iritziz gizarte zerbitzuak hobetzea eta berriak martxan jartzea lehentasuna da, “etxebizitza babestuen eraikuntza sustatzearekin batera, anbulatorio berria egin dezaten bultzatuko dugu. Halaber, Gizarte Zerbitzuen Saila lekualdatzearen alde lan egingo dugu, pertsona gehiago artatzeko espazioa egon dadin”.
Gazteentzat etxebizitza, aisia eta kirol aukera berriak proposatu dituzte. Enplegua sustatzeaz gain, babespeko eta alokairuzko etxebizitzak bultzatzea da EAJren asmoa, horretarako diru laguntzak mantenduz. Kirol eta aisia eremu berriak ere dituzte jomugan jeltzaleek, tartean skate parkea, ur jolasak egiteko aukerak, edo kirol anitzeko guneak, “eta beharrezkoak diren kudeaketak ere egingo ditugu Eusko Jaurlaritzak institutuko jolastokiko zati bat estali dezan”.
Herritarren zahartzaro aktibo eta osasungarria ere dago Lezoko EAJren ardatzen artean, “orain arte bezala”, Martiarenaren esanetan. Adierazi du 2031. urtean lezoarren ia %47k 55 urte edo gehiago izango dituela, eta horien ongizatea hobetu eta bermatu behar dela: “Jada martxan dauden programei jarraipena emango diegu, Tipi Topa, Bidez Bide, kirol orientazio zerbitzua… Eta ekimen berriak aztertu eta abiaraziko ditugu, Lagunkoia, Etxean Bizi edota adineko pertsonek jasaten duten bakardade egoerari aurre egiteko programak”.
Berdintasun eta bizikidetza alorrean, “balioetan eta errespetuan oinarritutako herria eraikitzeko” konpromisoa bere egin du herriko EAJk, “inor atzean uzten ez duen herri hezitzailea, kohesionatua eta sozialki orekatua izateko, behar gehien duten pertsonen beharrei erantzunez, gizon eta emakumeen arteko berdintasuna sustatuz, elkarbizitza indartuz, adineko pertsonen ongizatea bermatuz eta proiektu berriak abiaraziz herritar guztien, haur gazte zein helduen bizi kalitatea eta ongizatea hobetzeko”.
