Rafael Bergaretxe buru izango duen zerrenda aurkeztuko du EAJk, bihar
Oiartzungo batzokian ekitaldia egingo dute herritarrekin, arratsaldean, zerrenda osoa aurkezteko. Eider Mendoza Batzar Nagusietako presidenteak parte hartuko du.
Rafael Bergaretxe, egungo udal taldearen eleduna, izango da alkategaia. Hilabete eta erdi eskas falta da udal hauteskundeak izateko, eta aurkeztuko direnak hasiak dira beren asmoen berri ematen. Pauso hori ematen hurrena EAJ izango da. Rafael Bergaretxe izango da alkategaia, eta bihar —osteguna— aurkeztuko dituzte zerrendan berarekin batera joango direnak. Bergaretxe zinegotzia da gaur egun, eta jeltzaleen udal taldearen bozeramaile lanak egiten ditu.
Arratsaldean ekitaldia egingo dute oiartzuarrekin batera, batzokian (Euskal Herria plaza). 19:00etan hasiko da aurkezpen saioa, eta Oiartzungo hautagaiez gain, Eider Mendoza Gipuzkoako Batzar Nagusietako presidentea izango da bertan. EAJk Oiartzunentzako eta Gipuzkoarentzako dituen proposamenak jakinaraziko dizkie bertara hurbiltzen direnei.
Eguerdian, berriz, prentsarentzako agerraldia egingo dute, hautagaitza aurkezteko.
