EAJk bere zerrenda aurkeztu du, hazten jarraitzeko asmoarekin
Rafael Bergaretxe izango da alkategaia, eta bere atzetik egun zinegotzi direnak joango dira. Elkarbizitza ezberdin baten aldeko apustua egin du.
Eguerdian egin dute agerraldia. Arratsaldean afiliatuekin elkartuko dira. Oiartzungo EAJk bere zerrenda aurkeztu du gaur goizean. Rafael Bergaretxe izango da alkatetzarako hautagaia, eta zerrendan hurrengo hirurak egun zinegotzi direnak izango dira.
Ekitaldira Maite Peña eta Aintzane Oiarbide gonbidatu dituzte. Gipuzkoako foru gobernuan dauden Oarsoaldeko bi kideak dira, eta biek ala biek eskerrak eman dizkiote Bergaretxeri gonbidapenagatik. Oiarbidek —Bide Azpiegituren diputatua da— Bergaretxeren konpromisoa joera txalotu ditu: “gorabeherarik gabeko abertzale sendoa da, herrigintzaren aldekoa, langile fina eta Oiartzungo beharrak ongi ezagutzen dituena”.
Oiarbidek zuzentzen duen sailak Oiartzunen egindako inbertsioa azaldu du: Lintzirinen moldatutako bidea. “Trafikoa antolatu eta hobetzeko balio izan du”.
Peñak, berriz, alkategaiak lan gaitasun handia eta kudeaketa dituela esan du, eta herritarrei entzuten badakiela. Gizarte Politiken diputatua da, eta hainbat erronka dituztela aipatu du. Gizartearen zahartzearena nabarmendu du, eta eurek plan estrategikoa dutela Oarsoalderako.
Elkarbizitza
Bi errenteriarren ondoren, Bergaretxek hartu du hitza. Oiartzungo EAJ aurrera egiten ari dela esan du, eta hala egiten jarraituko duela. “Horretan sinetsi egin behar dugu”, gaineratu du. EAJren ardatz politiko, sozial eta zibilak errespetuan, tolerantzian eta askatasunean oinarritzen direla baietsi du.
“Elkarbizitza mota ezberdin baten alde egiten dugu. Onartu behar da egon direla aurrerapausoak, baina udal pixka bat atzean geratu da. Biktimei aitortza eta egindako minarena onartu behar dira. Zerbait egiten ari da, isilean, baina aurrera egiteko ezinbestekoa da”, gaineratu du Bergaretxek.
Horrez gain, esan du EH Bilduren udal gobernuak jarrera itxia duela hainbat gaietan: atez atekoa, Urkabe Baita etxea…”Gehiengoen eta gutxiengoen jokoa ulertzen dugu, baina ezin da alperra pasatzen gobernatu”.
Proposamenak
EAJren programaren proposamen batzuei errepasoa eman die Bergaretxek. Trafikoarena konpondu beharreko arazoa dela iritzi du: “Momentu batzuetan, hemen, Elizalde auzoan, aparkatzeko arazoak daude. Trafikoaren fluxua, gainera, aurre egin beharreko gaia da. Aldundiarekin elkarlanean aritu behar dugu, EH Bilduk egiten duenaren kontra”.
Berak ere zahartzea aipatu du. Gizarte zerbitzuek, alor horretan, ongi funtzionatzen dutela uste du, baina are hobeto funtzionatu behar luketela.
“Gure borondatea da zintzo eta oiartzuarren zerbitzura jardutea. Udalaren kudeaketa ongi beharreko zerbait da”, gaineratu du.
“Gure abala da EAJrena; Oiartzunen asko sufritu dugu asko eman dugulako. 1936an bi zinegotzi fusilatu zituzten, eta denak Ezkabako kartzelatik pasatu ziren”, gogorarazi du. Frankismoan eta ondorengo garaian ere hala izan dela esan du: “Klandestinitatean lan handia egindakoa da, eta indarkeriaren garaian tinko mantendu da EAJ. Orain ere bai”.
Hautagaiak
- Rafael Bergaretxe.
- Iñaki Arbelaitz.
- Maitane Larruskain.
- Yon Goikoetxea.
- Janire Mitxelena.
- Iñaki Olaizola.
- Jon Oiartzabal.
- Maria Gema Roteta.
- Miguel Jose Maria Idiazabal.
- Elene Oiartzabal.
- Lucas Ramon Etxebeste.
- Jose Antonio Sistiaga.
- Jacinto Larburu.
- Mari Carmen San Jose.
- Amaia Burgos.
- Idoia Yeregi.
- Genaro Kortajarena.
