[Galeria] Korrika Txikia distantzian ez da txikia izan
Motorrak berotzen hasten arduratu direnak ikastetxeetako haurrak izan dira. Buelta ederra eman dute, eta ondoren txokolatea jan dute.
Lekukoa eskuz esku eraman dute ikasleek. Gaur arratsaldean, gauerako motorrak berotzeko, Oiartzungo ikastetxeetako haurrek Korrika Txikia egin dute bazkaldu ondoren. 15:00etan atera dira Beheko Plazako biribilgunetik, eta lekukoa eskuz esku pasatu dute. Korrika Txikiak aurrera egin ahala lekukoen adinak gora egin du.
Iturriotz eta Altzibar ziztu bizian pasatu ondoren, plazara iritsi da, eta han zain zuten txokolatea. Ikastetxeetara bueltatu dira, eta plazako giroak etenaldi txiki bat izan du. 17:00ak inguruan hasi da berriro girotzen, eskolaz kanpoko jarduerak egiten dituztenen erakustaldiekin.
19:00etan hasiko da Korrika Gaztea, eta ondoren giroak jarraituko du plazan. Afaldu eta gero, beroketa saioa egingo dute, eta 23:48an sartuko da Korrika nagusia. Indarrak hartu, gero beharrezkoak izango baitira.
