Nabigazioak eskainiko ditu 'Lucretia' belaontziak
Aste Santuan egunero itsasoratuko da, eta uda bitartean, astebururo
Aurrerantzean beste erakargarri turistiko bat izango du Pasaiako badiak. Lucretia belaontziak itsasora irteerak eskainiko ditu aurrerantzean.
Larunbata, igande eta jaiegunetan 50 minutuko bi irteera eskainiko ditu belaontziak, ordutegi finkoan eta taldea osatzeko beharrik gabe. Aste Santuan, berriz, bihartik (hilak 13) aurrera egunero-egunero eskainiko dituzte irteerak, beti ere itsasoaren baldintzek baimentzen badute. Lehen irteera 12:00etan izango da eta 13:00etan bigarrena.
Nabigazioaren hasiera eta irteera Donibaneko udaletxe ondoko ontziralekutik egingo da. Jendearekin topalekua udaletxeko sarrera izango da.
Ibilbidean, berriz, badiako interes puntu garrantzitsuenak ikusteko aukera egongo da, belaontziaren jabeen argibideak lagunduta. Belak igota bokalerantz irten eta Jaizkibel eta Ulia mendien itsaslabarrek eskaintzen duten panoramika ederra ikusteko aukera eskainiko dute. Azkenik, badiaren kanpoaldean Ulia eta Platako farolaren inguruan nabigatu eta berriz badiara sartuko da Lucretia, irteera puntura itzultzeko.
1927. urtean eraikitako belaontzi klasikoa da Lucretia, teka, haritza eta kaoba egurrez eraikitako ontzi nederlandar enblematikoa, 19,3 metroko luzerakoa.
Ostarte enpresak berriztatuta, gaur egun Kantauri itsasoan jardunean ari den itsasontzi zaharrenetako bat da.
Irteerak kontratatzeko edota informazio gehiago biltzeko:
Pasaiako Turismo Bulegoa (Victor Hugo Etxea – Donibane 63)
Tel: 943 34 15 56
Prezioak:
- 0-2 urte: doan
- 3-12 urtekoak: 12 euro
- Helduak: 16 euro.
