[Galeria] Oiartzunek, beste behin, erakutsi du euskararen alde dagoela
Korrikaren 21. ekitaldia Arraguatik sartu da, apirilaren 12a zela, eta Ugaldetxotik atera da, apirilaren 13an. Jende andanak parte hartu du.
Aurten ez. Aurten Errenteria-Oreretakoek ez dute Korrikaren lekukoa bahitu, eta aurreikusitako ordua baino pixka bat lehenago sartu zen Korrika, Arraguatik. Jendetza zegoen zain, eta Ugaldetxotik aurrera, koloretako sugeak errepidea guztiz bete zuen.
Korrikan gertatu ohi den moduan, harrera egiteko bakoitzak bere onena jartzen du: txalaparta, bengalak… Done Eztebe plazaren itxurak xanistebanetako txupinazoarena (ala gehiago?) zirudien. Momenturik hunkigarriena Iturriotzen izan zen: aste honetan hil den Ion Zabaleku Zaporen etxe aurretik pasatu zen Korrika, eta han ke poto berdeak piztu zituzten, eta ihoteetako —antolakuntzan sartuta zegoen— abestia jarri zuten. Txalo zaparrada izugarria izan zen.
Bretoiek Matteon hartu zuten lekukoa, eta Txipitoko maldak bere legea ezarri zuen, eta ordura arte multzo jendetsua zena argaltzen joan zen. Korrika joan da, baina euskara geratu da: 364 egun gehiago ditu.
