Ezohiko doinuekin eraikiko dituzte bertsoak, larunbatean
Maialen Lujanbiok, Jon Martinek, Miren Artetxek eta Beñat Gaztelumendik bertso musikatu saioa eskainiko dute larunbatean, pleno aretoan.
Maialen Lujanbio eta Beñat Gaztelumendi ariko dira bertsotan, Miren Artetxe eta Jon Martinekin batera. Larunbatean, hilak 27, bertso saio musikatua egingo dute, Oiartzungo Bertso Eskolak antolatuta. Adierazi dutenez, norabide aldaketa txiki bat egin dute: azken urtetan bertso poteo bat egin ohi zuten. “Ikusi genuen azken boladan jende gutxiago ibiltzen zela, beste mota bateko saio bat antolatzea erabaki genuen”, azaldu du Jon Martinek.
Luxuzko gonbidatuak ekarriko dituzte: Maialen Lujanbio, Beñat Gaztelumendi eta Miren Artetxe. Jon Martin bera izango da etxekoen ordezkaria. Gai-jartzaile lanetan, berriz, Haritz Casabal antxotarra arituko da. Musikari bezala Antton Aranburuk eta Beñat Urteagak jardungo dute. Biek ala biek Hotzikara izena zuen talde batean jotzen zuten.
Azkenaldian, bertso saio musikatuei dagokienez, bi korronte egon direla azaldu du bertsolari oiartzuarrak: “Bat Bershow ikuskizunean deribatu du: AEBetara joan ginen duela urte batzuk. Bestea, berriz, Ez da kasualitatea, neskek osatzen duten emanaldia da. Gaiak ere saiatzen dira lerratzen, saioetan normalean tokirik ematen ez zaien alor batzuetara”. Larunbatekoa bien arteko nahasketa bat izango dela jakinarazi du Martinek, “gutxi gora behera”.
19:00etan hasiko da saioa, pleno aretoan, eta aurretik ez da sarrerarik salduko. Hiru euroko prezio sinbolikoa izango dute, eta ikasleak musu truk sartuko dira.
Doinu ezberdinak
Normalean, bertso saio musikatuetan, bertsolaritzan ohikoak ez diren doinuak erabiltzen dituzte. Hainbat adibide jarri ditu Martinek: “Joan Manuel Serraten La la la; Lili Marlen; Andres Calamaroren Paloma… doinu asko daude musikatik datozenak. Alde horretatik, ohiko bertso saioen zale ez direnei gustatuko zaiela uste dut”.
Esan duenez, Errenteria-Oreretako Arkaitza tabernan eta Pasaiako Mimos tabernan askotan programatu izan dira gisa horretako saioak. Oiartzunen lehenengo aldietakoa izango da. “Gainera”, esan du Martinek, “Maialenek [Lujanbio] ez ditu bertso musikatu saio asko onartzen, eta alde horretatik luxu bat izango da bera Oiartzunen egotea”.
