Oporretarako ere askotariko eskaintza prestatu du Abaraxkak
Gaur arratsaldean ipuin kontaketa saioa egingo dute, eta larunbatera arte hainbat jarduera prestatu dituzte, gauza berriak ezagutzeko aukera emanez.
Maite Franko ipuin kontalaria. Ikasleentzako opor egunak dira hauek —eskolarik ez dute, behintzat—, eta Abaraxka ludotekak hainbat jarduera antolatu ditu arratsaldetan asper ez daitezen.
Gaur arratsaldean, ipuin kontaketa saioa eskainiko dute ludotekan bertan, Liburuaren Nazioarteko Eguna dela eta. Maite Frankok 3 eta 5 urte arteko haurrei Jateko moduko ipuinak kontatuko dizkie, 17:00etan hasita. Ipuinak “ederrak, barregarriak eta jateko modukoak” izango direla hitz eman dute.
Gaurkoarekin asetzen ez dena, bihar izango du munduko jolasak ezagutzeko parada, ordu eta toki berean. Ostegunean, berriz, elizara hurbilduko dira, bertako organoa ezagutzeko. Ostiralean ludotekara bueltatuko dira, harriekin jolasteko, eta larunbatean itxiko dute Abaraxkak oporraldirako prestatu duen egitarau berezia, argazkien pista jolasarekin.
