Tren Berdea eta sai arreak ikustea, astebururako plana Arditurrin
Arditurriko parketxeak bi ekitaldi antolatu ditu astebururako. Larunbatean meategiaren barrunbeak ezagutuko dituzte, eta igandean, saiak.
Datorren larunbatean, hilak 27, Arditurriko Trena berriro aterako da bidera, bisitariak eramateko. Arditurriko parketxeak prezio bereziak jarri ditu egun horretarako, bidaia eta meategietako bisita konbinatuz.
Trena Pagoaldea industriagunetik abiatuko da Arditurriraino. Hautatzen den bisitaren arabera tren ordutegi bat dagokiola jakinarazi dute. Honakoak dira ordutegiak:
Trena hirutan aterako da Pagoaldea industrialdetik: 10:00etan, 11:00etan eta 12:00etan. Hogei minutu iraungo ditu bidaiak, eta bueltako ordutegiak 11:30ean, 12:30ean eta 13:30ean izango dira. Tren bakoitza bisita hauek egiteko egokituko zaie bisitariei:
- Trena: 10:30etik 11:15era (bisita sakona) eta 10:45etik 11:15era (oinarrizkoa).
- Trena: 11:30etik 12:15era (bisita sakona) eta 11:45etik 12:15era (oinarrizkoa).
- Trena: 12:30etik 13:15era (bisita sakona) eta 12:45etik 13:15era (oinarrizkoa).
Oinarrizko bisitak bost euro balioko du (hiru euro, hamabi urtetik beherakoentzako) eta sakoneko bisitak zazpi, trenaren bidaiak barne. Kasu horretan, hamabi urtetik beherakoek bost euro ordaindu beharko dituzte.
Igandean, hegazti bila
Iganderako, berriz, sai arreen bizimodu eta ohiturak ezagutzeko ibilaldia egingo dute. Aiako Harria natura parkean habiak egiten dituzte hegazti sarraskijale horiek. Hitzaldi baten ondoren, ibilaldi motza emango dute, eta teleskopioz ikusteko aukera egongo da.
Euskarazko hitzaldia 10:00etan hasiko da eta erdarazkoa 10:30etan. Ondoren, bi taldeek bat eginez ibilaldia egingo dute 11:00ak aldera.
Bisitak 5 euroko prezioa izango du eta adin guztietako herritarrei zuzendua dago. Aurretik erreserba egitea beharrezkoa da, plaza mugatuak baitaude. Bestalde, bisita egunean bertan, prismatikoak eramatea gomendatzen da.
Hitzaldia osatzeko, eta baita datozen gainontzeko bisitariek ikus dezaten ere, argazki erakusketa bat egongo da ikusgai hilaren 28itik ekainaren 2ra arte. Paco Garcia Giriziako elkarteko kideak atera ditu argazki horiek, hogei urteko lanean.
Ate honetan, irekita
Arditurriko meategiak irekita egongo dira aste honetan —gaur izan ezik— . Aldez aurretik erreserba egitea gomendatu dute, eta horretarako Arditurri parketxera edota Errenteria-Oreretako turismo bulegora idatz daiteke edo Arditurrira deitu (943 49 45 21 edo 688 89 50 68).