Ekonomia alorreko proposamenak aurkeztu ditu Lezoko EAJk
Lezoko EAJren bi ardatz nagusiak tokiko ekonomia sustatzea eta kalitatezko enplegua sustatzea dira. Horren araberako neurriak aurkeztu dituzte.
Besteak beste, Iturrin industrialdea garatzen jarraitu nahi du EAJk. Maiatzaren 26ko udal hauteskundeei begira, Lezoko EAJk ekonomia alorrean dituen asmoen berri eman du. Bi ardatz nagusiak tokiko ekonomia sustatzea eta kalitatezko enplegua eskaintzea dira, horretarako hainbat neurri proposatuz. Jesus Mari Martiarena alkategaiak adierazi duenez, “enplegua ongizatearen berme nagusia da, horregatik, gizarte zerbitzu eta prestazioak bermatzeaz gain, lezoarrei lan aukera berriak eskaintzearen alde eta tokiko ekonomia sustatzearen alde lan egingo dugu datozen urteetan”.
Merkataritza eta ostalaritza sektorerako, horren azterketa iragarri du EAJk, “sektorea indartu eta Lezoko kaleak bizirik mantentzeko helburuarekin”. Hala, adibidez, Eguberrietan kaleak apaintzeko eta era berezian argiztatzeko konpromisoa agertu du Martiarenak, “tokiko kontsumoa sustatzeko eta saltokiak babesteko”.
Lehen sektorean, tokiko produktuen eta 0Km-koen kontsumoaren alde egin dute jeltzaleek, “landa ingurunea babestu eta lehen sektorearen etorkizuna bermatzeko, bertakoa kontsumituz”.
Industrian, Iturrin industriagunea berritzen jarraitzeko helburua adierazi du Lezoko EAJk, “enpresa berriak erakartzeko eta lanpostu berriak sortzeko”.
Langabezian dauden herritarrei formazio eta lan aukera berriak eskaintzeko, Oarsoaldea Garapen Agentziarekin elkarlanean Enplegu Plana babesteko asmoa du EAJk. Gainera, ekintzaileka programak bultzatzeaz gain, “Formazio eta Laneratze Zentro berria” eraiki dadin lan egingo du herriko EAJk, “ezgaitasunak dituzten edota bazterkeria egoeran dauden pertsonei laguntzeko eta behar bereziak dituztenen lan aukerak areagotzeko”.
