Gurasoen arteko gatazka taularatuko dute igandean, 'Jainko basatia'-rekin
Txalo Produzkioak antzerki taldeak Yasmina Rezaren lana jokatuko dute datorren igandean. Bi guraso bikote dira protagonista.
![JAINKO BASATIA](https://oarsoaldea.hitza.eus/site/files/2019/04/jainko-basatia-06.jpg)
Oiartzungo Antzerkizaleen Elkartearen apirileko zita datorren igandean izango da. Oraingo honetan, Txalo Produkzioak antzerki taldea gonbidatu dute, Jainko basatia joka dezaten.
Bi guraso bikote dira protagonista. Euren haurrek izan duten liskar batengatik elkartzen dira bikote baten etxean, modu zibiko batean konpontzeko. Haurren arteko borroka bat zena, gurasoen arteko gatazka bihurtzen da, alkohola erregai gisa duena. Umore garratzeko egoerak ditu obrak, eta Aitziber Garmendia (Ane), Mikel Losada (Alex), Tessa Andonegi (Veronika) eta Andoni Agirregomezkorta/Mikel Laskurain (Xanti) dira aktoreak.
Yasmina Reza frantziarrak idatzi zuen antzezlana, 2006an, eta arrakasta handia izan zuen. Bost urte beranduago, pantaila handira eraman zuen Roman Polanskik.
Antzezlana 19:00etan hasiko da, udaletxeko pleno aretoan. Ohi bezala, sarrerak bost euroko prezioa izango du eta han bertan erosi beharko da.