Liga bukatuta, Euskal Herria Koparen erronka dator Oiartzunentzat
Datorren asteazkena jai eguna izanik, Euskal Herria Kopako partida jokatuko dute Karla Lekuona futbol zelaian, Añorgaren kontra.
![oiartzun athletic](https://oarsoaldea.hitza.eus/site/files/2019/04/dsc_0230.jpg)
Pasa den asteburuan bukatu zuen Bigarren Mailako denboraldia Oiartzunek. Tituluarengatik borrokan ari zen Alavesen etxean jokatu zuten, eta jipoi ederra jaso zuten, 7-2 galduta.
Zapore gazi hori kentzeko aukera izango dute datorren asteazkenean, maiatzak 1. Izan ere, egun horretan hasiko dute Euskal Herria Koparen IX. ekitaldian ibilbidea. Añorgaren kontra jokatuko dute, Ugaldetxon, 12:00etan hasita. Multzoko beste arerioa, berriz, Eibar izango da. Sailkatzen denak final laurdenetan neurtuko ditu indarrak beste hiru multzoetako sailkatuetako batekin. Partida hori irabaziz gero, finalerdietara pasako lirateke, eta han han Athletic edo Reala izango dute zain. Lehen Mailan dauden taldeak dira horiek, eta Euskal Herria Kopako zortzi ekitaldietako final guztietan parte hartu dute. Ea Oiartzunek, zaila baduen arren, bipartidismo hori hausten duen.
Multzoak
- 1. multzoa: Añorga, Eibar eta Oiartzun.
- 2. multzoa: Aviron, Genets eta Alaves.
- 3. multzoa: Bizkerre eta San Ignacio.
- 4. multzoa: Mulier eta Berriozar.