'Zuk' dokumentala eskainiko dute gaur, migratzaileekin egiten den lana ezagutarazteko
10301 Elkartasun Keinuren eskutik, boluntarioek migratzaileekin egindako lanaren berri emango du filmak. Boluntario oiartzuarrek ere testigantza emango dute.
Apirileko oporraldiaren ondoren, 10301 Elkartasun Keinu iniziatibak bere ekitaldiak egiten jarraituko du. Atzo, Abaraxka ludotekan, munduko hainbat jolas ezagutzeko aukera izan zuten bertara hurbildu ziren haur eta gurasoek.
Gaur, berriz, Zuk dokumentala eskainiko dute. Mediterraneo itsasoa gurutzatzen duten migratzaileekin lan egiten duten boluntarioen lana azaleratzen du film horrek. Unax Blancok zuzendutako dokumentala da, Asier Garciak ekoiztutakoa eta Aitor Gametxoren gidoia du. Euskal Herriko zein Kioseko errealitatea pantailaratu dute dokumental horren bitartez.
Ikus-entzunezkoarekin ez ezik, arratsaldeko ekitaldira hurbiltzen diren oiartzuarrek herriko boluntarioen lekukotza bertatik bertara ezagutzeko aukera izango dute. Izan ere, Grezian lanean aritutako oiartzuarrak bertan egongo dira. Emanaldia eta ondorengo hitzaldia 19:00etan hasiko dira, pleno aretoan.
Gaur arratsaldekoaz gain, datorren astean ekitaldi gehiago egingo dituzte. Honakoak dira:
Hilak 30, asteartea
- Truk txapelketa solidarioa. 22:00etan, gaztetxean.
Maiatzak 1, asteazkena
- Endika Loiolaren diskoaren aurkezpena. 18:30ean, gaztetxean.
Maiatzak 4, larunbata
- Azoka solidarioa: goizez plazan, eta arratsaldez frontoian.
- Lasterketa, 11:00etan.
- 14:00etan: bazkari solidarioa eta bazkaloste musikatua. 14:00etan, Elorsoron. Txartelak salgai Sorgin, Kastro eta Kabitxon.
- 23:00etan: festaren jarraipena, gaztetxean.