10301 Elkartasun Keinuren festarako txartelak erosteko azken egunak dira
Maiatzaren 4an Elorsoro kiroldegian jaialdi solidarioa egingo dute. Herriko hainbat txokotan eros daitezke bazkarirako txartelak. Lasterketa ere egingo dute egun horretan.
'Zuk' dokumentalaren ondoren, hitzaldia egin zuten atzo. 10301 Elkartasun Keinu iniziatibak bere kanpaina solidarioa bukatzeko jaialdi handia egingo du hurrengo asteburuan. Elorsoro kiroldegia bete nahi dute maiatzaren 4an, eta bertan egingo duten bazkarirako txartelak salgai dituzte. Sorgin, Kabitxo eta Kastro tabernetan eros daitezke sarrerak, hamar euroren truke. Azkeneko egunak dira, antolatzaileek ohartarazi dutenez.
Paella jateak hamar euroko kostua izango du, baina hiru urtetik beherako haurrek ez dute deus ordaindu beharko. Edariak etxetik eraman daitezkeela gogorarazi dute 10301 Elkartasun Keinu dinamikako kideek. Bestela, taberna bat jarriko dute han, nahi duenarentzat. Bazkaldu ondoren, herriko musikariek arratsaldea girotuko dute.
Ez da egun horretan egingo duten ekitaldi bakarra izango. Goizean, lasterketa bat egingo dute, eta arratsean, berriz, kiroldegian hasitako parranda gaztetxean jarraitzeko aukera egongo da.
Zuk dokumentala
Atzo arratsean Zuk dokumentala eskaini zuten udaletxeko pleno aretoan. Ondoren, Zaporeak proiektuarekin Grezian egondako bi oiartzuar —Iraia Mujika eta Joxe Etxezurieta— aritu ziren beren lekukotzaren berri emanez. Aljeriatik iritsitako lagun bat ere berak izandako esperientziari buruz hitz egiten aritu zen.
