Kultur ekitaldiak berriz ere indartsu asteburuan Lezon
Dejabuk 'Linbo planeta' ostiralean emango du. Aste Santuko atseden aldiaren ondoren, asteburuan berriz ere kultura ekitaldiak izango dira Lezon. Ostiralean, larunbatean eta igandean izango dira jarduerak Gezala Auditoriumean, askotarikoak gainera.
Ostiralean, 17:30ean eta Gezalan, haurrentzako jarduera. Dejabu Panpin Laborategiaren eskutik, Linbo planeta antzerkiaz gozatzeko aukera izango dute sei urtetik gorako haurrek. Doan da emanaldia, eta bertan, bi aktorek parte hartuko dute, Miren Alkalak eta Alvaro Garaialdek. Behean ikuskizunaren trailerra.
Larunbatean, berriz, ikus-entzunezkoen txanda. 19:00etan, eta Gezalan, Aralar, mundua leku den lurra filma ikusteko aukera izango da, On Produkzioak eta Landarlan Ingurumen Elkarteak sortutako lana. Aralarri buruzkoa da. Hemen trailerra.
Igandean, 20:00etan eta Gezalan, helduentzako antzerkia. Perigallo Teatro Avilako (Gaztela Leon, Espainia) konpainiak Espacio disponible lana ekarriko du Lezora. Espaniako Estatuan tokia egiten ari den konpainia da Perigallo, eta aurten adibidez, hamarnaka dira herriz herri egiten ari diren emankizunak. Sarrerak zortzi euroko prezioa du. Hemen lanaren bideo bat:
