Adinekoen egoitzetan lan baldintza duinak aldarri
Grebara deitu du LAB sindikatuak Gipuzkoako adinekoen egoitzetan, eta horrenbestez, pasa den astelehenetik igandera arte, astebetez, greban izango dira. Herrialdeko hitzarmena lortzea du helburu sindikatu abertzaleak.
Adinekoen egoitzetako langileen elkarretaratzea Sanmarkosene kanpoan. Grebara deitu du LAB sindikatuak Gipuzkoako adinekoen egoitzetan, eta horrenbestez, pasa den astelehenetik igandera arte, astebetez, greban izango dira. Herrialdeko hitzarmena lortzea du helburu sindikatu abertzaleak. Hitzarmen horrek izan behar dituen ardatz nagusiak ere zehaztu ditu sindikatuak: Oinarrizko soldata toki eta foru administrazioen menpe dauden langileen bataz bestekoarekin homologatzea; kontratazioa zuzena, mugagabea eta aldi osokoa izatea; langileen ratioak eta mailak ezarriko dituen lan batzorde parekidea sortzea; eta prestakuntza kontutan izateko puntu garrantzitsua izatea.
Aurrekoak dira eskatzen aldarrikatzen ari diren lurraldeko hitzarmenaren oinarriak, baina horrekin batera egungo testuinguruaren irakurketa ere egin du LABek. Sindikatuaren arabera, Gipuzkoako helduen egoitzetako 5.000 langile herrialdeko hitzarmenik gabe daude, eta Gipuzkoako Foru aldundiari horiek baztertzea leporatu dio: “Ezinbesteko zutabea dira langileak eta ahoa betetzen zaio helduen egoitzetako zerbitzuaren inguruan hitz egiterakoan, baina gero alde batera uzten ditu langileak, baztertu egiten ditu”. Langileek sustengatzen dutela zerbitzu hori erantsi du, beren lanari esker betetzen eta errespetatzen direla egoiliarren eskubideak, “eta momentu askotan langileek osasuna galtzen dute”.
Beste aldera begiratzea egotzi dio aldundiari eta “joko zikina” sustatzea ere negoziazio prozesuan: ” Adegi eta Matia 2020 Patronalek ELA sindikatuarekin batera prozesu horretan parte hartzea erabaki zuten negoziazio mahaiaren, hau da, sektoreko langileen gainetik pasatuz. Negoziazio mahaiari balioa kentzea, mahaia bera blokeatuz eta sektorean mesfidantza sortzea da lortu dutena”.
Eredua alda dadin lanean eta mobilizatzen jarraitzeko asmo irmoa agertu du LABek, “funtsezko eskubideak hobetzeko, ez interes ekonomikoak saritzeko. helduen egoitzetako sektorea zerbitzu sozialen esparruan txertatzen den neurrian, zerbitzu publikoa behar duela defendatuko dugu, orain arte bezala enpresa pribatuen interesen araberako erabakiak hartu ez ditzaten”.
Lau greba egun aurretik, gaur hainbat mobilizazio egin ditu LABek Errenteria-Oreretan. Goizean elkarretaratzea egin dute langileek Sanmarkosene aurrean, eta ondoren auto karabana egin dute Oarsoaldeko lau udalerrietan barrena. Sektoreko langile guztiak deitu ditu LAB-ek azkenik, mobilizatzera, “herrialdeko hitzarmen duin baten alde”.
