Lezoko EAJk "herri atsegin, irisgarri eta kulturaki bizia" nahi du
Lezoko EAJk hirigintza, kultura, kirola eta aisia esparruetarako hainbat proposamen landu eta publiko egin ditu, udal hauteskundeei begira.
Arraitokin kirol gune bateratua sortu nahi du Lezoko EAJk. Hirigintza, kultura aisia eta kirol asmoen berri eman du Lezoko EAJk, udal hauteskundeen harira proposamenak eginez. Herriko kaleak berritzen jarraitzeko asmoa azaldu du, oinezkoei lehentasuna emanez. Kulturan, herri bizi eta euskalduna du helburu EAJk, eta aisia eta kirolean aukera berriak eskaini nahi ditu. “Herritarren egunerokotasuna, bizi kalitatea eta ongizatea hobetzea, eta herritarrei aukera berriak eskaintzea” da landu dituen proposamenen xedea.
Hirigintza asmoen artean, Altamira auzoa hobetzea, portuko saihesbidea egitea “herritarren segurtasuna hobetu eta trafiko jarioa murrizteko”, eta Arraitoki herriaren erabilpenerako berreskuratzea proposatu du EAJk. Altamirako hobekuntzetan sakonduz, bertako parkea berritzea dute xede jeltzaleek, “agintaldi honetan aurrera eramandako parte hartze prozesuan ekarpen eta proposamenak kontuan hartuta”. Gainera, bertan aparkatzeko eremua handitzea agindu du alderdiak, eta irtenbide mekaniko bidez irisgarritasuna hobetu. Herriari oro har begira Mugikortasun Plana egin nahi du, “pertsonen segurtasuna hobetzeko, trafikoa arautzeko, aparkalekuak aztertzeko eta ibilbide osasungarriak sustatzeko”.
Arraitokirako proposamen zehatza planteatu du Jesus Mari Martiarena alkategaiak: “Portuak herriaren esku uzten duenean, bertan aparkaleku itxiak egin nahi ditugu, eta kiroldegia eta igerilekua gune berean kokatzea da gure proposamena. Erabilera anitzeko eraikina sortu nahi dugu bertan inbertsio berriak eginez”. Espazio berria sortu nahi du, beraz, Arraitoki eremuan, igerilekua eta kiroldegia bateratuz, eta kirol anitzeko kantxak, ur jolasen eremua, skate parkea, edo txakurrentzako parkea sortuz.
Gainera, EAJren proposamenen artean dago Lezo Institutuko patioko zati batean estalkia jartzea.
Garbiketa eta mantenu lanen gaineko asmoak ere baditu Lezoko EAJk. Garrantzi berezia eman nahi diete lorezaintzari, hiri altzariei, kaleko argiztapenari nahiz saneamenduari.
Kultura, kirola eta aisia
Lezoko EAJren ustez, euskararen erabilera sustatu behar da eta horren aldeko konpromisoa berretsi du. Horretarako, eskualde mailan iniziatiba berriak bultzatuko dituela adierazi du.
Martiarena alkategaiak nabarmendu du kulturan eta herriko kultur taldeen jarduna babesten eta sustatzen jarraituko duela, “kultur eskaintza zabaldu eta eta herritarrei aukera berriak eskaintzeko”. Halaber, Arte Eskola berria sortu nahi du EAJk Salaberria familiaren laguntzarekin, “sormen artistikoa bultzatuko dugu arte eta musika lehiaketa berrien bitartez”.
