Gazteek IKT teknologiak nola erabiltzen dituzten aztertuko dute etzi
Herriko ikastetxeetako ikasleekin egindako azterketaren emaitzak emango dituzte asteazkenean. Arkaitz Larekik izango du ardura hori.
Oiartzungo hiru ikastetxeetako ikasleekin azterketa egin dute, Informazio eta Komunikazio Teknologiak (IKT) nola erabiltzen dituzten ezagutzeko. Elizalde Herri Eskolako, Elizalde Institutuko eta Haurtzaro Ikastolako ikasleen gurasoekin elkartuko dira datorren asteazkenean, hilak 8, emaitzen berri emateko. Hala ere, jakinarazi dute edonor joan daitekeela, saioa irekia izango delako.
Arkaitz Lareki ikerketaren zuzendari eta EHUko irakasleak emango ditu lanari buruzko azalpenak. Ekitaldia 17:30ean hasiko da, Manuel Lekuona bibliotekan. Besteak beste, telefono mugikorra eramateko adin egokienari, gurasoek ea badakiten gazteek zer egiten duten eta gazteek eurek erabilpenari buruz diotenari buruz ariko dira, besteak beste.
Azterketa horrek LH 5. mailako eta DBHko ikasleek IKTak nola erabiltzen dituzten ikertu du, eta gurasoek duten iritzia ere jaso dute.
