Baiona eta Galesetik etorriko dira udaberriko doinuak
Soinueneak urtaro oro egiten duen kontzertua datorren larunbatean egingo du, udaletxean. Ondoren, afaria egingo dute Ibargain Elkartean.
Buhaminak emakumeen abesbatza. Soinueneak, urtaro bakoitzean, kontzertua antolatu ohi du, eta udaberria joan baino lehen, loratzearen aldi honi egokitzen zaion saioa egingo dute. Datorren larunbatean izango da udaberriko kontzertua.
Ohi bezala, Euskal Herriko talde bat eta kanpoko beste bat izango dira gonbidatuak. Baionatik etorriko dira Buhaminak izeneko emakumeen abesbatza, Maialen Errotabeherek zuzendutakoa. Euskal abestiak ez ezik, espainiarrak, brasildarrak, afrikarrak eta abar kantatzen dituzte.
Beste abesbatza Galesetik iritsiko da. Gizonek osatzen dute, baina emakume batek zuzentzen ditu. Parti Cut Lloi dute izena.
Kontzertua 18:30ean hasiko da, udaletxeko pleno aretoan. Sarrerak bost euro balio ditu. Ohi bezala, kontzertuaren ondoren afaria egingo dute. Ibargain Elkartean izango da, eta bertara joan nahi duenak hamabost euro gehiago ordaindu beharko ditu.
