[GALERIA] Pasai Antxon, trumoikadarako prest
Antxoberfestak gaur du egun handia
Antxoko Garagardo Azoka, gaur, garagar eta lupulu zaleena ez ezik, motorraren munduko jendearen bilgune izango da. Auto klasiko ikusgarria eta Harley moto ikusgarriak izango dira egun osoan protagonista. Biteri plazan daude ikusgai eta arratsaldean, berriz, desfilean ariko dira Nafarroako etorbidean zehar, trumoikada zaratatsu eta ikusgarrian. American Crazy Cars elkarteko kideak dira, Antxobefestaren urteroko ohorezko gonbidatuak.
Ostegunean hasi zen Antxoberfest, eta egunero bildu du jendeak, nahiz euriak tarteka bisita egin duen. Ostegunean giro lasaiagoan, eta atzo jada, lepo jangelako mahaiak eta zumardiko karpa. Oraindik, baina, hoberena falta da. Gaur du egun handia azokak, eta ikuskizunen egitaraua horren erakusgarri.
Herriz bazkarian piztuko da giroa, – 250 lagunentzako paella jatea prestatu dute Gure Zumardian- eta hortik aurrera ordu txikiak hartu nahi adina dibertimendu: trumoikadaren aurretik Lasagaren parkour erakustaldia, eta ondoren Leire Project-en kontzertua. Brigadari omenaldia, elektrotxuflaren zoramena, eta oraindik nahiko ez duenarentzat gantxegitar anaien erritmo dantzagarriak, DJ festan.
