Emarrik marka berria jarri du 3.800 kiloko harriarekin
Probaldi bakarraren ondoren, hiru plaza pasatxo egitea lortu dute Usurbilen. 22 neskek mugitu dute harritzar hori.
Emarrikoak, entrenamenduan [facebook.com/emarritaldea].. Emarrik 3.800 kiloko harriarekin marka ezarri nahi zuen pasa den larunbatean. Normalean 550 kiloko harriarekin ibiltzen dira, eta harritzar horrekin gizaprobako marka jarri nahi zuten, emakumeetan.
Horretarako, 22 emakume behar izan dituzte, eta horiek aurkitzea oso erraza izan ez dela adierazi dio Olatz Mitxelenak Berriari. Larunbatera arte, saiakera bakarra egin zuten 3.800koarekin, eta plaza bakarra egin zuten.
Publiko dezente elkartu zen Usurbilgo probatokian, eta Emarrikoak animatu zituzten, marka berria ezarri arte. Azkenean, hiru plaza, bi zinta eta 2,20 metro osatu zituzten tiratzaileek. Probaren ondoren, harria bera puskatua geratu zen.
