Lezoko EAJk agintaldi berriari begira hamar lehentasun ezarri ditu
Lezoko EAJk, alkatetza berriz ere lortuko balu, lanerako lituzkeen lehentasunen berri eman du hauteskunde kanpainaren testuinguruan. Hamar lehentasun ezarri ditu, hainbat alorretan banatuta. Jesus Mari Martiarena zerrendaburuak nabarmendu du azken agintaldian herriak “aurrera” egin duela, “herri hobea, atseginagoa eta irisgarriagoa eraiki dugu. Ekindako bideari jarraipena ematea da gure nahia”. Legealdian, “gelditasun, paralisi, utzikeria, inprobisazio eta inposizio urteak atzean” utzi dituztela ziurtatu du Lezoko EAJk.
Alta, maiatzaren 26ko hauteskundeetan herritarrek bi ereduren arteko aukeraketa egin behar dutela azaldu du alderdiak, “bata, kontrolean, autoritarismoan, inposizioan eta ekimen zein proiektu faltan oinarritutakoa eta bestea, kudeaketa onean, planifikazioan eta etorkizuneko Lezo eraikitzen jarraitzeko proiektuetan oinarritutakoa”.
Horren harira, Markel Olano egungo ahaldun nagusia eta postu horretarako Gipuzkoako EAJren hautagaiak herria bisitatu du gaur goizean. Lezoko EAJk dituen hamar lehentasunekin bat egin du. Honakoak dira, hitzez hitz, hamar neurri horiek:
- Merkataritzari buruzko azterketa, sektorea indartu eta Lezoko kaleak bizirik mantentzeko.
- Formazio eta Laneratze Zentro berriaren sustapena desgaitasuna duten pertsonei edo baztertze egoeran daudenei zuzendua, eta Iturrin industriagunearen berritzea lanpostu berriak sortuko dituzten enpresak erakartzeko.
- Gizarte Zerbitzuen maparen hobekuntza egungo beharrei erantzuteko, bereziki, adineko pertsonen zahartzaro aktibo eta osasungarriari lotuta.
- Gazteei zuzendutako alokairua eta etxebizitza babestuaren sustapena, haien emantzipazioa errazteko.
- Erabilera anitzeko espazioa eta eraikin berria Arraitokin, Estatuko Portuak-ek lurraren lagapena egin ondoren, aparkaleku itxiak, kiroldegia edota igerilekua egiteko.
- Irisgarritasunaren hobekuntza eta espaloien berritzea oinezkoak lehenetsiz: igogailu berria Ijurkon zein Musika Eskolan eta ur sareen, saneamenduaren eta argiteriaren hobekuntza.
- Kirolerako eta aisialdirako espazio berrien sorrera: kirol ezberdinak praktikatzeko kantxak, ur jolasak, skate parkea…
- Kultur sormenaren sustapena: kultur egitaraua zabaldu, kultur taldeen jarduna babesten jarraitu, arteari eta musikari lotutako lehiaketa berriak abiarazi eta Arte Eskola berria sortu.
- Altamira auzoaren eta parkearen hobekuntza: aparkaleku eremua handitu eta irisgarritasuna hobetu zinta mekaniko eta igogailu berriaren bitartez.
- Udaltzaingoa zerbitzua gauez ezarri segurtasuna hobetzeko.