Aizpea Otaegi: 'Komunitatean ardaztutako etxebizitza eredu berri bat sustatzeko hautua egin dugu'
Emantzipazioaz, etxebizitza ereduaz, gazteez eta prekarietateaz aritu da gaur EH Bildu. Agerraldia egin du gaur goizean koalizio subiranistak Errenteriako Udalak martxan jarri duen etxebizitza komunitarioaren aurrean, eta emantzipazio politikak bultzatzea lehentasuna dutela esan du.
Aizpea Otaegi Itziar Ostolaza zinegotzi eta zerrendakidearekin eta Nerea Kortajarena legebiltzarkidearekin.Argazkia: EH Bildu Emantzipazioaz, etxebizitza ereduaz, gazteez eta prekarietateaz aritu da gaur EH Bildu. Agerraldia egin du gaur goizean koalizio subiranistak Errenteriako Udalak martxan jarri duen etxebizitza komunitarioaren aurrean. Bertan izan dira Aizpea Otaegi alkategaia, Itziar Ostolaza Gazteria zinegotzia eta udal hauteskundeetarako zerrendako hirugarrena eta Nerea Kortajarena legebiltzarkidea.
Bizitza duinak bere jardun politikoaren erdigunean kokatu nahi dituela esan du Otaegik, eta eremu horretan, erdigunean, kokatu ditu gazteentzako EH Bilduk dituen emantzipazio politikak, eta gogora ekarri du Errenteriako Udalak sustatutako parte hartze prozesuan 180 gaztek hartu zutela parte, “emantzipazioaren gaineko arazoa nabarmendu zuten. Gazteek planteatutako beharraren aurrean, arazoaren errora joan eta etxebizitza eredu berri bat sustatzeko hautua egin dugu, komunitatean ardaztua eta Holanda, Danimarka edo Kataluniako esperientzi arrakastatsuak oinarri dituena”.
Merkatuak ezartzen duen jabetza pribatuaren logika gainditzea duela xede etxebizitza komunitarioak erantsi du Otaegik, “etxebizitza publikoak sustatuz eta egun eskubide ez dena eskubideago bilakatzeko anbizioz. Norberak bere etxebizitza propioa izan beharrean, proiektuak, komunitatean bizitzeko gonbita luzatzen du”. Horretarako proiektu arkitektonikoak espazio ezberdinak ahalbidetu dituela azaldu du, “gazteen intimitaterako naiz sozializatzeko beharrak uztartu ahal izateko”.
Alokairu soziala aplikatu dutela etxebizitza komunitarioan ere esan du EH Bilduren alkategaiak. Horrenbestez, gazte bakoitzak bere diru sarreraren %15 ordainduko du errentan eta gehienez hiru urtez bizi ahal izango da bertan. Gazteei etxebizitzarako sarbide erreala eta duina eskaintzen diela etxebizitza komunitarioak esan du, baina harago doala, “herri kohesionatua eraikitzeko hazia erein nahi du, profil ezberdinetako gazte askoren topaleku izango baita etxebizitza”. Horixe dutela erronka nagusia nabarmendu du, “bide eder honen abiapuntu eta jomuga, pertsonon, gazteon bizitzak eta beharrak erdigunean okatuko dituen herria eraikitzea”
Datuak eman ditu Kortajarenak. Kezkatuta azaldu da gazteen prekarietatearekin legebiltzarkidea, “gure gazteen soldata %70 igo beharko litzateke etxebizitza bat alokatu ahal izateko”. Baldintza horietan ia ezinezko bilakatzen dela euskal gazteentzat emantzipatzea esan du, “euskal gazteen %65a gurasoekin bizi da eta gora egin du datuak azken hamar urteotan; zigortuenak 20 eta 29 urte arteko gazteak dira”. Europako emantzipazio altuena dutela euskal gazteek erantsi du Kortajarenak, “30 urtetan kokatzen da, eta okerrera egin du datu horrek azken urteetan”.
Horren aurrean baldintzak sortzeko prest azaldu da, “ezin dugu-eta horrelako egoerekin konformatu edo zain geratu” eta emantzipazio politikak bultzatzea lehentasuna dela EH Bildurentzat erantsi du, “Oreretak martxan jarritako proiektu komunitarioa horren adibide argiena da”.
