[Bideoa eta galeria] Kalteak neurtzeko garaia
Itsasgora, euri zaparrada mardul eta etengabeak, eta zero kota. Hiru faktore horiek bat egin zuten atzo eta Maria Lezo, Xenpelar, Biteri Txiki eta Foru Plazan urak gainezka egin zuen. Fanderia inguruan ere izan dira kalteak.
Garbitzen jarraitu behar izan dute gaur, kalteak zenbatekoak izan diren jakiteko direnean oraindik. Itsasgora, euri zaparrada mardul eta etengabeak, eta zero kota. Hiru faktore horiek bat egin zuten atzo eta Maria Lezo, Xenpelar, Biteri Txiki eta Foru Plazan urak gainezka egin zuen. Fanderia inguruan ere izan dira kalteak. Hainbat saltoki, taberna, atari eta garajetan ura sartu eta kalteak eragin ditu. Zenbatekoak diren zehaztea ezinezkoa da oraindik, aseguru etxeak kaltetutako komertzio eta lokaletik ez direlako pasa oraindik, eta haiek egingo dute balorazioa bat.
Babes zibileko boluntarioa eta udaltzaingoa aritu ziren lanean atzo ura sartutako lokaletatik bonbekin ateratzen. Gaur beste bat da irudia atzo kaltetu ziren kaleetan, baina lokatz arrasto batzuk dira oraindik espaloietan eta galtzadan, nahiz eta garbiketako langileak haiek garbitzen ari diren.
40 zentimetro hartu zituen urak Rosmi dendan. Beheko aldea hartu ziola urak azaldu du jabeak. Gaur zabalik zuten denda, eta garbiketa lanak egiten jarraitzen zuten: “Saltzen duguna ehun gaiak dira eta horrek ura hartzen du. Altzariak ere hondatu ditu urak, baina entxufeak libratu ditugu, eta ez da gutxi, eskerrak”. “Ahul” den saltoki txikien egoera gordinago egiten dutela halakoek dio, “natura halakoa da, zonalde hau txarra da eta itsasgora eta ekaitza batera tokatzeak daukana da, nonbaitetik atera behar du urak”.
Ubeda jantzi dendan garbiketa lanetan ari ziren, baina ez dute adierazpenik egin nahi izan. Orduña zapata konpontzaileen dendan ere sartu zen ura atzo. Materiala batez ere hondatu zaie, “dendako ura bonbekin hustu zuten, baina komunean pilatu zen ura eta beherago dagoelako haraino ezin izan zuten bonba sartu. Orain garbiketa egitea tokatzen zaigu. Batez ere materiala hondatu zaigu, baina baita konpontzeko genituen bezeroen oinetako batzuk eta jaka bat. Balorazioa egiteko zain gaude, aseguru etxekoa etorri da jada eta ea zer gertatzen den”.
Fotoprixen ere sartu zen ura: “Heldu nintzenean urez lepo zegoen denda, saltoki sarrera guztia lokatzez beteta zegoen eta barrualdea urez zegoen beteta. Altzariak, lurra eta entxufeak busti dira, baita materiala ere eta ezin dugu zabaldu ezin dugulako ordenagailurik konektatu, ezta argirik piztu ere. Aseguru etxea pasa zain gaude. Denda ezin dugunez zabaldu, galerak izango ditugu”.
Lina saltokira ez da urik sartu, “zortea izan dugu”, baina oso gogoan du aurretik izan zen uholde handia, “ur gehiago pilatu zen orduan, izugarria izan zen eta orduan bai sartu zen ura gure dendan. Oraingoan guk zortea izan dugu”. 1997ko ekainaren 1ean izan ziren uholde haiek, duela 22 urte, baina saltzaileetako batzuk oso gogoan dituzte.
Amelie Boutiquean ere sartu zen ura atzo, eta oraindik ere ur arrastoak zituzten dendan: “Batez ere atzeko aldean eragin dizkigu kalteak, bertan genituen oinetako kutxak busti dizkigu baita zokaloak ere. Itxoiten ari gara aseguru etxea pasa arte partea egin eta kalteak kalkulatzeko”.
Bien bitartean Bernar Lemos Hirigintza zinegotzia dendaz denda ibili da teknikoekin batera kalteak neurtu eta merkatari eta kaltetuen zalantzak argitzeko: “Atzo izan ginen kaltetuetako batzuekin, eta gaur berriz ere ari gara lokaletatik pasatzen egoera zein den jakiteko eta zalantzak argitzeko”.
Bideoak eta irudiak bolo-bolo ibili ziren atzo sare sozialetan. Horietako batzuk dira azaltzen direnak, besteak gaurkoak.
