David Lumbreras: "Errenteria herri segurua bilakatu nahi dut"
Errenteriako Udalerako hautagaitza aurkeztu duten bost alderdietako alkategaiak elkarrizketatu ditu HITZAk. Sei galdera erantzun dituzte, guztiek berberak. Hurrenkera, indar politiko bakoitzak duen ordezkaritzaren araberakoa izango da. Honakoa, elkarrizketa horien artetik lehena, egun Errenteriako Udalean ordezkaririk ez duen PPren alkategaia den David Lumbrerasi egindakoa.
David Lumbreras PPren hautagaia alkatetzarako. Argazkia: Carrera Errenteriako Udalerako hautagaitza aurkeztu duten bost alderdietako alkategaiak elkarrizketatu ditu HITZAk. Sei galdera erantzun dituzte, guztiek berberak. Hurrenkera, indar politiko bakoitzak duen ordezkaritzaren araberakoa izango da. Honakoa, elkarrizketa horien artetik lehena, egun Errenteriako Udalean ordezkaririk ez duen PPren alkategaia den David Lumbrerasi egindakoa.
Zergatik bozkatu behar zaituzte herritarrek?
Errenteria herri segurua bilakatu nahi dut. Egungo gobernuak sakon ahaztu du gai hori, eta gainera, udaltzainei bere lana zuzen eta segurtasunez egitea oztopatu die.
Alkate bazara, zein izango da egingo duzun lehenengo gauza?
Udaltzain kopurua handitu errenterian, eta beren lana inongo trabarik jarri gabe egiten utzi, eta ez egungo gobernuak egiten duen moduan.
Azken bi agintaldietan Errenterian elkarbizitza eta bakegintzan zabaldutako bidea jarraituko duzue? Nola?
Udaltzaingo kopurua handituta, eta egun gobernuan daudenak udaltzaingoari ekiten ez uztearekin onartzen duten delinkuentzia jazarrita.
Mugimendu feministak presentzia nabarmena izan du, eta indar handia duela erakutsi du azken bi urteetan, batez ere. Indarkeria matxistak ez du etenik, zoritxarrez, eta neurri asistentzialetatik harago, neurri integralak eskatu ditu mugimendu horrek indarkeria matxista ezabatzeko. Nola erantzungo diozue horri?
Errenterian dagoen udaltzain kopurua handituko dugu herritar bakar batek ere edozein biolentziagatik beldurrik senti ez dezan. Errenteriako bizilagunak seguru sentitzea nahi dugu, eta gaizkileak, berriz, ez daitezen eroso sentitu gure artean.
Indar handia duela erakutsi duen beste kolektiboa jubilatuena da. Urteak darama kalean hileko lehen astelehenero pentsio duinak, zahartzaro duina bermatzeko neurriak eskatzen. Nola helduko diozu gai horri?
Pentsioena ez da udalak kudeatzen duen gaietako bat, beraz, ez dut proposamenik pentsioen gaiaren gainean.
Aurreikusi daiteke emaitzak “estuak” izan daitezkeela. Itunetarako ateak zabalik al dituzue? Norekin?
Ateak zabalik ditut adostasunetara heltzeko Errenterian udaltzain kopurua handituko duela bermatzen didan alderdiarekin. Gainera, udaltzainak aske jardungo dutela, haiek politizatu gabe, eta denaren gainetik herritarren segurtasuna bilatzen dutenekin prest izango naiz itunetarako.
