Gauzak bere onera, pixkanaka
Jaizkibelgo errepidean lurra kentzeko lanean ari dira oraindik; errepidea eguerdirako irekitzea aurreikusi dute.
Jaizkibelgo errepidean garbiketa lanak egiten jarraitzen dute, eta udaltzainen beharra dago trafikoa bideratzeko. Pixkanaka normaltasunera itzultzen ari dira Pasaia eta Lezo, atzoko uholdeen arrastoak eta ondoriok oraindik ere agerikoak diren arren hainbat bazterretan.
Momentu honetan arazo larriena Donibanen dago, Jaizkibelgo errepidean. Luizia izan zen atzo bertan, eta oraindik ere errepideko lurra garbitzeko lanean jarraitzen dute. Ondorioz errepideak trafikorako itxita jarraitzen du. Hori bai, Pasaia-Lezo Lizeoko autobusen trafikoa bermatzen ari dira udaltzainen laguntzaz.
Bestela, Lezo eta Donibaneko arteko errepidea zabalik da atzo arratsaldeko 16:00az geroztik. Ordura arte, eta errepidea garbitzeko lanak egin bitartean, Portutik desbideratu behar izan zuten trafikoa.
Trintxerpen ere erori da lurra, Bordaenea kalera, eta arrastoak oraindik ere garbitzeko dituzte.
Zuhaitz erorketak ere izan dira, atzo Gran Sol kaleko 1 zenbakian, eta gaur goizean, berriz, Donibane pasealekuan, Santa Anako ermitara doan errepidean, garraio publikoaren ibilbidean aldaketak egitera behartuta.
Antxon ere izan ziren atzo iluntzean arazoak. Udaltzainek jakinarazi dutenez Oarso kaleko transformadore batek kea jaurtitzen hasi zen bere barruan pilatutako uraren ondorioz. 20:15ak inguruan jazo zen ezbeharra eta suhiltzaileak eta Iberdrolako langileak bertaratu ziren. 21:00etarako konponduta zuten arazoa.
Lezo eta Donibane arteko errepidea garbitu dute eta zabalik da atzo arratsaldeaz geroztik.
