Ion Carballo etxekoan berriz ere garaile
Itsas kayakeko Euskadiko XV. Koparen bigarren proba puntuagarria jokatu da Pasaian; taldekako sailkapenaren buru, Pasaia Kayak.
Araneta, Carballo eta Rodriguez, Senior Mailako podiumean Ezbaian egon zen luzaroan egin ala ez ez gin, eta azkenean, bai, egiteko aukera izan zuten, baina eguraldiak hala behartuta ibilbidea 10 kilometrora laburtuta eta badia barruan.
Pasaia Kayak taldeko arduradunek azaldu dutenez, Arando Txiki inguruan, Senekozuluan, egin behar izan zituzten parte-hartzaileek 4 ziaboga, Gurutzeko Puntatik aurrera ez zegoelako giro, olatu pikoekin, haize-bolada indartsuekin eta euri-zaparrada mardulekin.
Zailtasunak zailtasun, proba ikusgarria ez ezik, lehiatua. Estropadaren buruan lau palista eta horietatik hiru pasaitarrak: Ion Carballo, Aritz Araneta eta Lander Rodriguez, eta hirukote pasaitarrarekin lehia estuan, Oier Aizpurua zumaiarra.
Azken poparean jo zuen erasoa Carballok, eta zumaiarrak erritmoari eutsi zion azkenera arte. Helmugan, bien artean, segundo bat baino gutxiagoko aldea: 98 ehunenekoa baino ez.
Atzetik, Aritz Araneta 13 segundora, senior mailako bigarren postua lortuz, eta atzerago Lander Rodriguez, 51 segundora, maila horretako podiuma taldekide pasaitarrekin osatuz berriz ere, Aizpuruak beteranoen mailan lehiatzen delako.
Emakumeetan, beste behi nabarmentzekoa Amaia Benavente errenteriarraren lana. Garaipena nagusitasun osoz lortuz zuen Pasaia Kayak harrobiko palista. Donostia Kayak-ekin lehian epe motzean da itzultzekoa talde pasaitarrera.
K-2etan aipatzekoa Antton Aranetaren eta Txema Yarza beteranoaren ontziak lortutako bigarren postua, zumaiarren atzetik.
Talde osoaren lan eta puntuei esker, itsas denboraldiko taldekako bigarren garaipena lortu zuen Pasaia Kayakek atzo, Zumaiako Itxas-Gain eta Donostiako Fortunaren aurretik. Gauzak honela talde pasaitarrak handitu egin du Koparen sailkapen nagusian zumaiarrekiko duen tartea.
Aiora Irazu, Espainiako Kopako finalera
200 eta 500 metroko sprint olinpikoko Espainiako 2. Kopa Galizian lehiatu da asteburuan, eta han izan da Pasaia Kayak taldekako Aiora Irazu, gazteen mailako lehian.
Bi probetan A finalerako txartela lortu du oiartzuarrak. 200 metrokoan, atariko proban lehenengo hogeita zazpien artean sartu eta hiru finalerdietako bat jokatzeko aukera irabazita, finalerako txartela lortu zuen hirugarren postuan sailkatuz. Finalean, baina, ez zuen hobetzerik lortu, eta 9. amaitu zuen.
500 metrokoa ere lan bikaina egin zuen Irazuk, atariko sailkapena ondo gainditu, bere finalerdian hirugarren sailkatuta berriz ere. Finalean, ahaleginak ahalegin, ezin izan zuen 9. postua gainditu.
