Eguraldi txarra egin arren, giro beroa egon da Elizalde Egunean
Krosa bertan behera gelditu arren, prestatua zituzten ekitaldiak aurrera eraman zituzten. Hurrengo zita ekainaren 2an izango dute.
Elorsoroko harmailak bete ziren, ikasleen emanaldinek akuilatuta. Pasa den igandean ospatu zen 2018-2019 ikasturteko Elizalde Eguna. Eguraldi petralak ez zituen ikastetxeko komunitateko kideak beldurtu; krosa bertan behera gelditu zen, baina hortik aurrerakoak bikain atera zirela berretsi dute guraso elkarteko kideek.
10:30 inguruan hasi zen festa, eta familiek beren haurrek egindako lanak ikusteko aukera izan zuten. Bisita egin zuten eraikinaren barrutik. “Hitz bat, mila irudi egitasmoaren baitan Kontrapas kantuaren gainean egindako maketak eta lanak ikustekoak ziren! “, esan dute guraso elkartekoek.
Ondoren, Elorsoro kiroldegira joan ziren, eta judo, gimnastika erritmikoa, akrobatikoa eta euskal dantza ikusteko aukera izan zuten, emanaldi nagusia baino lehen. HH2ko ikasleei ongietorria eman zieten, eta DBH4koak agurtu; HH2 eta LH6 ikasturteen artean dauden ikasleek beren ikuskizuna eskaini zieten harmailak bete zituzten ikasleei.
Bazkaria… eta ondorengoak
Sorpresaren bat egon zen emanaldi nagusi horretan, zikloz ziklo eskainitako ikuskizun “paregabeen ondoren”. Izan ere, irakasleek dantza “martxosoa” egin zutela nabarmendu dute guraso elkarteko kideek. Gosearen harra sartuta, inoiz baino lagun gehiago sartu ziren eskolako jangelan. “Giroa ona eta jatekoa, bikaina. Hori gutxi ez balitz, aurten estreinako aldiz, kantari eman genuen bazkalostea; eztarriak urratu arte”, zehaztu dute.
Arratsaldean tenperaturak ez zuen behera egin. Txikienak tailerretan aritu ziren, jolasean, eta koxkorragoak, puzgarrietan. Gainerakoak dantzan jarri zituen Mikeltxi dj-ak. “Oso arratsalde pasa polita izan zen, eta giroa, berriz, ezin hobea. Horrelako egun batek pizten duen gogo eta ilusioarekin, indartsu gaude ekainaren 2ko Euskal Eskola Publikoaren Jairako ere”. Errenteria-Oreretan izango dute hurrengo zita, Xenpelarrek duela mende eta erdi inguru luzatu zuen gonbitari kasu eginez.
