"Iraganera bueltatu edo etorkizunerantz egin", EAJren galdera lezoarrei
Lezoko EAJk egindakoen, eta egin asmo dituztenen zerrenda zabaldu du ohar bidez. Jesus Mari Martiarenak aurrera begira jartzeko eskatu die herritarrei.
Egindakoen, eta egiteko daudenen zerrenda zabaldu du Lezoko EAJk. Lezoko EAJk, igandeko hauteskundeei begira, botoa emateko bi aukera nabarmendu du. “Iraganera bueltatu edo etorkizunerantz egin” erabaki beharko dute lezoarrek EAJren ustez igandean. Jeltzaleen arabera, azken agintaldiak Lezok “aurrera” egin du haien kudeaketari esker, “gogor lan egin dugu lezoarrren behar eta eskariei aurre egiteko”. Eta alderdiak abiatutako bideari bultzada eskatu dute, boto bidez: “guk egin bezala, udal baliabideak zorrotz eta eraginkortasunez kudetuko dituen gobernua behar du, pertsonak helburu zein ardatz izango dituena, anbizioduna, iniziatiba eta proiektu berriak dituena”.
Agintaldian kudeaketa “eraginkorra” egin duela azaldu du Lezoko EAJk, eta udal gobernuak gaitasuna izan duela beste erakundeekin batera elkarlanean aritzeko, “atzean utzi ditugu liskar, konfrontazio, paralisi, ekimen falta, inposizio eta inprobisazio urteak”.
Egindakoak
Egindakoen eta egiteko daudenen errepasoa egin dute Jesus Mari Mariarena buru duen hautagaitzako kideek. Batean zein bestean, zerrenda luzea osatu dute. Hala, egindakoen artean, adinekoen zahartzaro aktibo eta osasuntsurako iniziatibak, haur parkeen berritzea, Herri Eskolako jolastokiko estalkia, Altamirako biribilgunea berritzea, herriko lehen kaleko igogailua (Bekoerrota-Altamira artekoa), Donibane-Lezo bidegorria, Jauregialden aparkaleku gehiago egitea, 5. edukiontziaren ezarpena, kultur lokal berria, Gabonetako argiteria, edo kulturara eta jaietara bideratutako aurrekontuaren handitzea zerrendatu ditu EAJk. Gainera, kiroldegian eta Gezala Auditoriumean hobekuntzak egin direla azaldu du EAJk, eta kaleak “txukun eta garbi mantentzeko mantenu lanak” egin direla. Udal webgune berria ere egindakoen zerrendan dago, eta Altamiran egindako parte hartze prozesuari ere garrantzia eman diote.
Egitasmoak
Egiteko daudenen artean ere, zerrenda luzea: industriagunea zaharberritzen jarraitzea, herriko merkataritzan gaineko ikerketa egitea, gazteentzat alokairuzko etxebizitzak nahiz babestuak sustatzea, Gizarte Zerbitzuen mapa hobetu eta zahartzaroa osasuntsua bultzatzeko iniziatibak mantentzea, Arraitokin erabilera anitzeko espazioa nahiz aparkaleku itxiak egitea, kaleetako irisgarritasuna hobetzen jarraitzea besteak beste. Altamirarako ere proposamen zehatzak: aparkaleku berriak sortu auzoan, bertako jolastokia hobetu, eta irisgarritasunean urratsak egin. Eta kultura eta kirol alorrean ur jolasen eremua (balizko kirol eremu berrian), edo Arte Eskola aurkeztu dituzte. Udaltzaingo zerbitzua gauera zabaltzea ere dago EAJren asmoen artean.
