"Gertutasuna eta entzute aktiboa" EAJren lan ereduaren oinarri
Komunikazio eta informazio bide berriak garatzeko konpromisoa hartu dute jeltzaleek.
“Gobernu ona”. Horixe da EAJren arabera beren lan eredua, “gertutasunean, gardentasunean, kudeaketa zorrotz eta eraginkorrean” oinarrituta, Nahikari Otermin alkategaiaren ustez “udal baliabideak modurik eraginkor eta zorrotzenean kudeatzea ezinbestekoa”delako “herritarrei zerbitzurik egokiena eskaini eta inbertsioak egin” ahal izateko. “Herritarren zerbitzura gaude eta herritarren zerbitzura lan egitera gatoz, herrigintzan sinesten dugulako”, gaineratu du.
Ildo beretik, hurrengo agintaldian, herritarrengandik gertu egoteko konpromisoa hartzen dutela gaineratu, eta gobernantza modu berria bere egiteko konpromisoa hartu dute, herritarren partaidetza bultzatuz.
Horiez gain, herritarrekiko komunikazioa areagotu eta hobetzeari lehentasuna emango diotela agindu dute, horretarako informazio eta komunikazio kanal berriak zabalduz.
Izan ere, igandean bi aukera baino ez dituzte aurreikusten jeltzaleek: “EH Bilduren inposaketa, inprobisazio eta urteetan erakutsi duen herri proiektu ezaren aurrean eta sozialisten ekintzailetza eta proiektu faltaren aurrean”, edo EAJren “Pasaiarako herri proiektu sendoa” “herritarren behar eta kezkei erantzuten diena””
Pasaiarako alternatiba bakarra EAJ dela sinetsita daude: “Gu gara alternatiba bakarra, gu gara Pasaiak behar duen aukera eta aldaketa, Pasaiari behin betiko bultzada emateko”.
