EH Bildu garaile hirugarrenez, eta emakumezko alkatea lehenengoz
Estu aurreikusten ziren emaitzak, baina eroso irabazi du koalizio subiranistak, zortzi urteko kudeaketaren ostean, 2011n jaso zituenak baino emaitza hobeagoak jaso ditu. Bederatzi zinegotzi eskuratu ditu, 6.941 bozka, 2015ean baino 1.000 bozka gehiago.
Emaitzak ezagutu bezain pronto ospatu zuten EH Bildukoek Bilgunean EH Bilduk irabazi ditu udal hauteskundeak. Estu aurreikusten ziren emaitzak, baina eroso irabazi du koalizio subiranistak, zortzi urteko kudeaketaren ostean, 2011n jaso zituenak baino emaitza hobeagoak jaso ditu. Hortik ondoriozta daiteke, beraz, herritarrek babestu dutela EH Bilduk alkatetzan eta udalaren gidaritzan zortzi urteetan egin duen lana. EH Bilduk hirugarrenez erdietsi du garaipena Errenteriako Udalean eta eroso egin du, emaitza oso onekin. Bederatzi zinegotzi eskuratu ditu, 6.941 bozka, 2015ean baino 1.000 bozka gehiago.
Ez dagoela bi hiru gabe erakutsi du koalizio subiranistak, eta gainera lehenengoz bere historian, emakumezko alkatea ekarri dio Errenteriari.
Ez zuen erronka makala EH Bilduk udal hauteskunde hauetan; alkategaia berria zuen, politika munduan ibili gabea, eta horri Julen Mendozak aurreko bi agintaldietan lortu duen erreferentzialtasuna eta herrian utzi duen arrastoa gehitu behar zitzaion. Aizpea Otaegik gidatuko duen taldeak, ordea, duela zortzi urte hasitako “bide eder hau” egiten jarraitzeko behar duen babesa, ez nolanahikoa gainera, jaso du errenteriarren aldetik.
PSE-EE bigarren indarra izan da 5.273 boto eta sei zinegotzirekin. Jose Angel Rodriguezek eta berak gidatu duen zerrendak EH Bilduren aurka egin duen higadura politikak ez ditu espero zituzten emaitzak eman. Postu trukaketa egin dute EAJk eta Elkarrekin Podemosek. Azken hori hirugarren indarra izan da azken agintaldian, baina EAJk bozka gehiago eskuratu ditu, 3.012 denera, hiru zinegotzi mantenduko ditu, eta hirugarren postuan kokatu. Elkarrekin Podemos laugarren indarra izango da, 2.656 botorekin, zinegotzi bat galduta.
Emaitza oso onak EH Bildurentzat
Aizpea Otaegik EH Bilduk lortutako emaitzak “ikaragarriak” izan direla esan du, “2011n lortutako emaitzak baino hobeagoak dira, eta uste dut horrek adierazten duela zortzi urte hauten egindako bidea jendeak babestu duela, eta sekulako balioa ematen dio egindako lanari”.
Soziologikoki Errenteria-Orereta aldatzen ari dela adierazten duela emaitzak erantsi du Otaegik, “eta honek etorkizunera begira beste leku batean kokatzen gaitu herri gisa”.
EH Bilduren kanpaina amaiera ekitaldian Otaegik esan zuen bazela garaia emakumezko alkate bat izateko Errenterian. Heldu da momentu hori eta bera izango da Errenteriako lehen emakumezko alkatea. Zer suposatuko dion galdetuta, “ohore izugarria” dela esan du, eta erakusten duela EH Bildu prest dagoela gizartea eraldatzen laguntzeko. aitortza egin dio Otaegik mugimendu feministari, amaitzeko, “ni gaur alkate izateko lekuan baldin banago mugimendu feministak egin duen borrokari esker izango delako, eta uste dut nagoen tokitik eta etorkizunean egongo naizen tokitik ere mugimendu feministaren helburuekin bat eginez lagundu behar dudala gizartearen transformazioan eta berdintasun handiagoa lortzen, eta horretan saiatuko naiz”.
