EH Bilduk irabazi du Pasaian, orain dela lau urte galdutako nagusitasuna berreskuratuz
PSE-EE da bigarren indarra eta EAJ hirugarrena
EH Bilduren alkategai Junkal Mintegia, kontaketa bitartean, Pasai Antxon Espainiako Gorteetarako emaitzei erreparatuta indar politiko nagusienen arteko lehia estua izan zitekeela aurreikus zitekeen, baina aldeak, oraingo honetan, handiagoak izan dira. EH Bilduk irabazi ditu hauteskundeak Pasaian, sei zinegotzi lortuta.
PSE-EE da bigarren indarra, zinegotzi kopuruari dagokionez ez gora eta ez behera —bost lortu dituzte sozialistek—, eta EAJ hirugarren indarra izan da, lau zinegotzirekin —bat galdu dute jeltzaleek—. Ahal Dugu-Equo Berdeak alderdiak, azkenik, bi zinegotzi lortu ditu eta ordezkaritzarik gabe geratu dira Ezker Anitza, PP eta Ciudadanos.
Emaitzak jakin berritan oso pozik mintzo da EH Bilduren alkategai Junkal Mintegia: “Balorazio oso ona egiten dugu. Pasaian irabazi dugu, aldea ere handia izan da, eta jendea ilusio handiarekin dago”.
Aurrera begira, baina, zuhurtziaz mintzo da: “Ikusteko dago ea zer gertatzen den besteek egin ditzaketen paktuekin. Ikusiko dugu zer gertatzen den. Guk hasieratik esan dugun bezala, guztiekin hitz egiteko prest gaude, baina behintzat, emaitzekin, pozik oso”.
Gertatuak gertatu, beren egitekoa argi du Mintegiak: “Bihartik aurrera lanera, ez dago besterik. Lanean hasi eta batekin eta besteekin hitz egiten hasi, bai udal barruan, eta jakina, baita gure boto emaile eta jendearekin”.
Parte hartzea
Parte hartzea 2015. urtean baino hiru puntu txikiagoa izan da (%60.03), baina kontuan hartuta orain dela lau urte atez atekoaren aferak eraginda asko igo zela —hamar puntu baino gehiago 2011kako datuekin alderatuta—, lehen begiratuan dirudiena baino datu hobeagoa da parte hartzearena. 2015ean %63,40koa izan zen, eta 54,03koa 2011n.
