EH Bilduko hamabi eta EAJko bost, udalbatza osatuko duten zinegotziak
Jexux Leonet buru dutela, koalizio subiranistakoak gehiengoa izango dira eserleku gehiago egongo diren udalbatzan. Gainontzeko bostak jeltzaleak izango dira.
Aurreko hauteskundeekin kateatua, badirudi biziarteko kanpaina bizi izan dugula. Atzo bukatu zen sentsazio hori, udal, foru eta europar hauteskundeekin. Oiartzunen, erroldaren %68,46 hurbildu zen hauteslekuetara. Atzo, gainera, berritasun handi batekin zetorren zita: udalbatzako kideak hamahirutik hamazazpira pasatu dira, biztanleriak 10.000ko langa gainditu duelako.
EH Bildu argi eta garbi nagusitu zen atzoko udal hauteskundeetan. 3.615 boto jaso zituen koalizioak, duela lau urte baina ia 500 gehiago. Jexux Leonetek karguan errepikatuko du; Oiartzunen ia exotikotzat jo daiteke hori, duela 24 urte ez baitzen betetzen. Hamabi izango dira koalizioak izango dituen zinegotziak.
EAJ ere gora egin zuen, modu xumeago batean. Ia ehun boto gehiagokoa izan zen beren uzta. Bost zinegotziko taldea osatuko dute. Alderdi konstituziozaleek ez dute, bederatzigarren aldiz jarraian, ordezkaririk lortu.
Hamazazpi zinegotzietatik bederatzi izango dira jarraituko dutenak, eta zortzi aurpegi berri izango dira. Honakoak izango dira: EH Bilduko Agustin Lekuona, Olaia Lasa, Josu Delgado, Olga Leibar, Haizea Saez de Egilaz, Goratz Gezala eta Arrosa Lizaso; eta EAJko Janire Mitxelena.
