Foru eta europarretan ere bai, EH Bildu garaile
Udal hauteskundeetan baino boto gutxiago jaso badituzte ere, koaliziokoak irabazle izan dira, eta EAJ bigarren postuan gelditu da, Podemosen aurretik.
Bati baino gehiagok koordinazioa ongi koipeztatuta edukitzea eskertuko zuen atzo. Izan ere, udal hauteskundeez gain, foru hauteskundeak eta Europakoak egin zituzten.
Bietan EH Bildu nagusitu zen, boto gutxiago eskuratuta. Foru hauteskundeetan 300 bat papertxo gutxiago eskuratu zituzten, eta europarretan 700 bat gutxiago. Parte hartzea, hiru kasuetan, %68aren barruan sartu zen.
Beste alderdi abertzalea —EAJ— gelditu zen bigarren postuan, hiru hauteskundeetan. Foraletan ia ez zuen botorik galdu, eta europarretan 100 pasatxo galdu zituen.
Udal hauteskundeetan ez zegoen Podemos izan zen hirugarrena, PSE-EEri aurre hartuta, aurkeztu zen bi bozketetan. Europarretan forukoetan baino boto gehiago lortu zituen. Sozialistek 200 eta 300 boto artean dituzte Oiartzunen, eta PP ez da ehunera iristen.
Hautagaitza entsalada ederra egoten da europarretan. Oiartzunen, gainera, datu kurioso bat utzi zuen: Centristas por Europa hautagaitzak 280 boto lortu zituen, estatu osoan 15.000 pasatxo eskuratu zituenean.
