Hondakin-uren araudia ez betetzeak ondorio ekonomiko larriak ekarri ditzakeela ohartarazi dute
Behin eta berriz salatu arren, Pasai Donibaneko hondakin-urak kudeatzeko azpiegiturak, berdin jarraitzen dutela salatu du Eguzki Talde Ekologista eta Antinuklearrak.
Pasai Donibaneko hondakin-urek, kalte ekonomiko handiak eragin ditzakete Europako araudia bete ezean. Urak badian isurtzen dituztela, hau da, sentikor izendatutako urak zikintzen dituztela gogorarazi du Eguzki Taldeak. Badiaren ur kalitatea eta bizilagunen osasuna kaltetzeaz gain, isun ekonomikoak ere etor daitezkeela adierazi dute ekologistek.
Botere publikoen utzikeriaren aurrean, bizilagun askoren haserrea jakitera eman nahi dute. Aferak luze jo du, hamarkada bat. Gipuzkoako saneamendu planak, ur hondakinen azpiegituren berritzea 2007 eta 2011 urteetan aurreikusten zuen arren, egoerak berdin jarraitzen du. Hortaz, 91/271/CEE Zuzentarauaren 4. eta 5. artikulua urratzen jarraitzen dute. Europar Batasuneko Justizia Auzitegiak 2018an esandakoari jarraiki, isunak 12 milioi eurokoak izan daitezke.
Eguzki Taldeko kideak, Pasai Donibaneko hainbat eragilerekin batera, 2017ko azaroan mozio bat aurkeztu zuten Pasaiako Udalean, ur-hondakinei lehentasuna emateko asmoz. Udalari presio egiteko eskatu zioten arren, egoerak berean jarraitzen duela nabarmendu dute ekintzaileek.
