Lezoko EH Bildu: "Lezok aurrera egin dezan herriko alderdi nagusiek akordioetara iritsi behar dute"
Igandean lortutako emaitzekin eta garaipenarekin gustura dago Lezoko EH Bildu. Elkarrizketa erronda hasiko dute, lehenik, EAJrekin.
Lezoko EH Bilduren zerrendakideak. “Ilusioz, gogoz eta arduraz hartuko dugu Lezoko Udalaren gidaritza”. Lezoko EH Bilduk igandeko udal hauteskundeen balorazioa egin du. Igandeko bozek utzitako panoramaren aurrean, baikor dira eta esker oneko mezua zabaldu du koalizioak: “Herritarrek argi hitz egin dute: Lezok aurrera egin dezan herriko alderdi nagusiek akordioetara iritsi behar dute”. Ildo horretan, hasteko, EAJrekin harremanean jarriko direla esan dute EH Bilduko kideek, “jakitun gara EAJk lortutako emaitza ona izan dela”. Gobernua osatzeko aukera guztiak zabalik mantenduko dituela adierazi du koalizioak.
1.418 boto lortu zituen EH Bilduk igandean, 2015eko udal hauteskundeetan baino 277 gehiago, “oso pozik gaude emaitzarekin. Lehen indarra gara, eta gainera nabarmen igo dugu boto kopurua azken udal hauteskundeetako kopuruei kasu eginez”. Eta horregatik bereziki eskerrak eman dizkiete EH Bilduren boto papera kutxan sartu zuten lezoarrei, “baina baita beste aukera politikoen alde egin zuten herritarrei ere. Konbentzituta gaude, denon artean, Lezo hobe bat eraikitzeko aukerak zabalik dauzkagula”.
Hrritarrek emandako agindua betetzeko eta akordioetara iristeko “prestutasun osoa” azaldu du EH Bilduk: “Desberdinen arteko harremanak zinez aberasgarriak direla ikasi dugu azken hilabeteotan burutu dugun Lezo Errotik parte hartze prozesuari esker. Herritarrek iragan igandean garbi hitz egin zuten. Beraz, orain, alderdi politikoen txanda iritsi da, Lezo elkarrekin lanean hasteko garaia heldu zaigu”.
