Eskoziarrez beteko da Gaztaño
Gaztaño auzoko jaiak helduko dira hilaren 14an, eta urtero bezala egitarau zabala eta aberatsa prestatu dute.
Haurrentzako ere egitarau zabala prestatu dute Gaztañon. Gaztaño auzoko jaiak helduko dira hilaren 14an, eta urtero bezala egitarau zabala eta aberatsa prestatu dute. Mexiko eta Kuba aurretik izan dira, eta aurten berriz, Eskozia eta eskoziarrek hartuko dute Gaztañoko Errepublika Independentea. Urtero larunbatarekin egiten duten herri afaria Eskozian girotuta egingo dute eta auzo elkarteko kideek azaldu dutenez afarirako salgai jarri dituzten 220 txartelak agortu dira jaiak hasteko ia bi aste falta direnean. Mozorrotuta joatea eskatu dute afarira, “giro berezia ematen diolako eta jendeari gustatu zaio erantzuna bikaina izan delako azken urte hauetan”, eta girotzeko musika ere ez da faltako: Deiedra folk taldea arituko da. Urtero bezala kontzertuak, haur jolasak, txapelketak eta Gaztañotik Mundura Munduko beste bazterretatik ekarritako musika, dantza, janariak eta edariak dastatu eta entzuteko aukera izango da.
Kirolak ere izango du tartea, herri krosa antolatu dute zazpigarrenez, eta ondoren haur krosa izango da. Bizikleta kronoeskalada berriz, ez dute aurten egingo.
Txupinazoa 19.00tan botako dute, Maritxu hodei beltzetik lokal berrira zuzenean jaisten den unean, eta ordubete beranduago zabalduko dute Iratxo iturria sagardoa bertatik dastatzeko. Ostiralean bertan (hilak 14) antolatu dute Gaztañorock kontzertua Jo ta tiro, Rezikle, eta Red Hot Txili Pipar taldeek joko dute.
Gaueko ajea kentzeko larunbatean herri lasterketak esnatuko ditu auzotarrak. Musikak ere ez du kale egingo larunbatean, eta gaztetxean lehenik, Young Kids, Desorden, eta State alerta taldeak arituko dira, eta Gaztañoko karpan berriz Deiedra Folk Taldea eta dagoeneko, jaietako gonbidatu berezia duten DJ Bull.
Igandean, haurrena izango da arratsaldea apar eta uraren festekin.
Hiru egunez hamaika ekitaldi eta adin guztiei begirako egitaraua antolatu du Gaztañoko jai batzordeak, beste behin. Ez da horrekin amaituko ordea. San Juan egunean ere antolatu dituzte ekintzak, udari merezitako ongietorria emateko. Protagonista nagusia, Arramendi magaleko sua izango da, baina aurretik haurrentzat herri kirolak eta ikuskizuna antolatu dute, baita zezen suzkoa ere.
Egitarua
Ostirala, 14
- 17:30: Eriz Magoa.
- 19:00: Txupinazoa eta Maritxuren jaitsiera. Ondoren, buruhandiak.
- 20:00: Iratxo iturria zabalduko dute.
- 20:30: Patata tortila lehiaketa.
- 23:00: Gaztañorock kontzertua: Jo ta tiro, Rezikle, eta Red Hot Txili Pipar.
- 01:00: Gaztetxean DJak, Ralph Wuiggum.
Larunbata, 15
- 10:30: Gaztañoko VIII. Krossa eta jarraian VII Haur krossa. Sariak banatu eta gero pintxo poteoa.
- 16:00: Mus Txapelketa.
- 17:00: Haur jolasak.
- 19:30: Auzo batukada.
- 21:00: Afari herrikoi kubatarra. Ondoren bingo musikala.
- 23:00: Kontzertua gaztetxean: Young Kids, Desorden, eta State alerta taldeak arituko dira.
- 00:00: Gaztañoko karpan Deiedra Folk Taldea eta ondoren DJ Bull.
- Goizaldean, Sorginen edabe magikoa.
Igandea, 16
- 12:00: Toka eta bote txapelketa.
- 14:00: Auzoko gazte izandakoei bazkaria.
- 17:00: Apar festa eta ondoren uraren jaia.
- 17:00: Lokal berrian kontzertua.
- 18:30: Gaztañotik mundura.
Igandea, 23 Sorginen gaua
- 17:00: Haurrentzako herri kirolak.
- Arratsaldean zehar, txorizoa, saiheskia, txingarra…
- Iluntzean ikuskizuna eta ondoren sua piztea, bideo emanaldia eta suzko zezena.
