Tximeletak hegan egin dezan
Juneren Hegoak elkarteak haur marrazketa lehiaketa antolatu du lehenengoz. 4 eta 14 urte arteko haurrei begirakoa da eta Juneren Hegoak zer den beraientzat islatu beharko dute.
Juneren Hegoak elkarteko boluntario batzuk Euskal Eskola Publikoaren Jaian. Marrazki lehiaketa antolatu du lehenengoz Juneren Hegoak Elkarteak. Haurrei begirakoa da lehiaketa hori, eta helburua, azken horiek Juneren Hegoak zer den beraientzat azaltzea izango da. 4 eta 14 urte arteko haurrei zuzenduta dago (urte horiek barne) eta hiru kategoriatan banatu dute: A kategorian 4-6 urte arteko haurrek hartuko dute parte; B kategorian 7-10 urte artekoak; eta C kategorian, 11-14 urte artekoak.
Gai nagusia, Juneren Hegoak elkartearen Tximeleta. Parte hartzaileek gainera, elkarteak berak sortutako irudiak edo asmoak ere isla ditzakete.
Lehiaketara aurkeztutako marrazki guztien artetik 12 hartuko dituzte, lau kategoria bakoitzeko 2020. urteko egutegia osatzeko. Sariak, berriz, mordo bat, lehiaketan Albaolak, Aquariumak, Galaxy Txikiparkek, Mater Museoak, Mirandaola museoak, Kutxa Ekogunea Parkeak, Kutxa Espazioak, eta Realaren Fundazioak kolaboratzaile direlako eta opariak emango dituztelako.
Parte hartzaileek beren ideiak irudi bihurtu, eskaneatu eta Juneren Hegoak elkartearen helbide elektronikora bidali behar dituzte uztailaren 15a arte, izena, abizenak, adina eta telefono zenbakia adierazita. Marrazkia ere utz daiteke Juneren Hegoak elkarteak Errenterian duen egoitzan edo postontzian (Martin Etxeberria 15, behea). Irabazleak aukeratzeko, Juneren Hegoak elkarteko boluntarioak arituko dira lanean eta irabazleak uztailaren 30ean jakinaraziko dituzte sare sozialen bidez, egun bat aurretik egingo baitute sarien zozketa elkartearen egoitzan 19:00etan hasita.
Haurren gaixotasun, heriotza edo dolu esperientzia bizitzean kalteberatasun egoeran dauden Gipuzkoako familientzat laguntza sarea sortzea da Juneren Hegoak elkartearen helburua.
