Homofobiari kolore biziz egingo diote aurre
Francisen omenezko ortzadar zebrabidea margotuko dute igandean 23:00etan; aurretik, 12:30ean haren omenezko oroitarria inauguratuko dute.
40 urte pasa dira polizia batek tiroz Vicente Vadillo Francis trabestia Iztietako Apolo dantzalekuan hil zuenetik. Lau hamarkada bete dira hilketa homofobo hartatik, baina bizi-bizirik jarraitzen du Francisen irudiak bere herrian. Sei urte dira, lehenengoz transexual, lesbiana, gay eta bisexualen eskubideak aldarrikatzen dituen ortzadarraren koloreekin zebrabidea margotu zutela haren omenez. Haren omenez, eta herriko gay eta lesbiana aitzindariei esker onez. Homofobiaren aurkako ikurra da, askatasunaren aldekoa, Biteri kalea eta Iztieta batzen dituen zebrabidea, eta urtero hutsik egin gabe autoen joan etorri zein oinezkoen higadurari aurre egiteko berritzen dute, fobiak aldendu eta memoria berritzeko erritualean.
Aurten ere hala egingo dute. Francisen omenez, homofobiaren aurka, edo gauza bera dena, aniztasuna eta askatasunaren alde, intolerantziaren kontra arituko dira igandean ortzadarraren koloreak berritzen, indartzen elkartuko diren herritarrak. Hilaren 9an, igandearekin, egin dute hitzordua 23:00etan EHGAMek, Saretuz Proiektuak, Iztietako Gurekin Auzo Elkarteak, eta Errenteriako Udalak, eta horrekin bat egitera deitu dituzte herritar guztiak.
Aurretik baina, eta hilketaren 40. urteurrenaren harira, Francisen omenezko oroitarria inauguratuko dute igandean bertan, 12:30ean. Beste hitzordu bat ere finkatu dute aurten, izan ere, hilaren 11n (asteartea) Un hombre llamado florde otoño filma emango dute Niessen Zinematan 19:30ean.