Sahararekiko elkartasunak ez du etenik Donibanen
Saharar jardunaldiek aurrera jarraitzen dute. Bixi Bixi elkarteak hainbat ekimen burutuko ditu asteburuan, saharar herriaren egoeraz ohartarazteko.
Aziza Brahimek kontzertua eskainiko du Donibaneko frontoian. Abeslaria Algerian jaio zen, erbestean. Gora Herriak egitasmoak Euskal Herri eta Mendebaldeko Sahararen arteko solidaritatea eta elkar ezagutza sustatzeko deialdia egin dute egunotan. Pasai Donibaneko Bixi Bixi elkarteak ez du sare horren parte izateko aukera galdu. Maiatzaren 30ean hasita eta ekainaren 15a arte, Sahararen aldeko jardunaldiak antolatu ditu.
Atzo saharar politika konplexuaren gakoen berri eman zuten Garazi Hach Embare eta Hassana Aalia ekintzaileek. Aalia urteak daramatza Bilbon bizitzen, erbesteratuta.
2010an Gdeim Izik kanpalekuko protestetan parte hartzeagatik epaitu zuen Marokok. Ordutik, bizi osoko zigorra ezarri nahi dio monarkia absolutistak Aaliari.
Gaur 19:00etan saharar jakiak prestatu eta dastatzeko aukera izango dute Donibanera joaten direnak, Bixi Bixi elkartean.
Bi herrien arteko nahasketa musikalaren txanda izango da bihar. Aziza Brahim eta Oreka TXko txalapartariek kontzertua emango dute 21:30etan, Donibaneko frontoian. Brahim, sahararren deserriratzearen eredurik onena da. 1976ean jaio zen Algerian, Tindufeko errefuxiatu guneetan. Urtebete lehenago gauzatu zuen Marokok Sahararen okupazioa.
Igandean, goizeko 11etatik aurrera, Pasai Donibaneko plazak Smara edota Bir Lehlu hirien antza hartuko du. Haima, saharar oihalezko etxe tradizionala eraikiko dute. Bertan hainbat ekintza egingo dituzte: Halima Yassinen eskutik te dastaketa, Melfah eta Daraa erakusketak, dantza ikastaroa eta Henna tatuajeak.
