[Galeria] Azkenekoz margotu dute
Azken aldiz margotu zuten atzo Francisen omenez eta eta herriko gay eta lesbiana aitzindariei esker onez ortzadar koloreko zebrabidea. Gizarteratze lana egin dutelako eta LGTBI kolektiboaren gaineko diagnostikoa egin duelako udalak erabaki dute iniziatiba amaitutzat ematea.
Francisen omenez margotutako zebrabidea azken aldiz margotu zuten ortzadar kolorez zebrabidea 2019an. Azkenekoz margotu dute. Nafarroa etorbidea Iztieta auzoarekin lotzen duen zebrabidea azken aldiz margotu dute gauerdian. LGTBI kolektiboari aitortza egin, eta Francis Vadilloren oroimena ez itzaltzeko duela sei urte margotu zuten lehen aldiz zebrabide hori. Urtero hutsik egin gabe berritu dizkiote koloreak, memoria bera berritzeko ariketa egiteko, LGTBI kolektiboaren eskubideak aldarrikatzeko; baina heldu da azkenera EHGAMek, Saretuz Proiektuak, Iztietako Gurekin Auzo Elkarteak, eta Errenteriako Udalak hasitako iniziatiba, eta horren zergatia azaldu zuten atzo gaueko ekitaldian Imanol Miner eta Mikel Martinek.
Sei urte hauetan lortu dute gizarteratzea gaia, Francis oroitu dute, memoria kolektiboan finkatu, eta homofobiaren mamua astindu ere egin dute: “Eskoletan gaia lantzen da egun, aurrera urratsa garrantzitsua da, eta naturaltasunez hitz egiten da, Francisek bere lekua du hemen”. Bestetik, LGTBI kolektiboaren egoera, beharrak, eta zein neurri hartu behar diren normalizaziorako bidean bildu dituen diagnostikoa egin berria du udalak, LGTBI kolektiboa osatzen duten pertsonekin noski, eta ostiralean aurkeztuko ditu emaitzak Emakumeen Etxean. Gauzak horrela, zebrabidea margotzeari uzteko unea heldu dela erabaki dute antolatzaileek, LGTBI kolektiboaren aitortza egin eta eskubideak bermatzeko lana aurretik izango bada ere oraindik.
Jende ugari bildu zen atzokoan, urtero egiten duten jai giro berean murgilduta, eta tartean ziren datorren larunbatean Donostiako Guardetxean aurkeztuko duten Harro Plataformako ordezkariak ere: “Garai batean ez zen gaiaz hitz egiten, ezkutuan eramaten zen. Gaur berriz, gu gatoz zebrabidea margotzera, eta ama eta amona ere gurekin datoz”. Hala egin zuen Harro plataformako kide batek, haren ama eta amonak ere margotu zuten atzo zebrabidea.
Ortzadar koloreko zebrabideari tratamendu berezia emango diote betikotzeko, higadurak urra ez dezan, orain 40 urte Iztietan polizia batek trabestia eta euskalduna izateagatik Francis tiroz hil zuela ahantz ez dadin; Francis nor izan zen, berekin zer gertatu zen denek jakin dezaten. Horren harira, atzo eguerdian omenaldia eta plakaren inaugurazioa egin zuten inguru berean. Plaka berria ez bada ere, (Patxiku zelaian zegoen aurretik) berria da haren kokapena. Ortzadar kolore zebrabidearen ondoan izango da aurrerantzean. Antolatzaileek margotu zuten lehenik, alderdi politikoetako ordezkariak aritu ziren ondoren, eta azkenik eragile eta norbanakoen txanda heldu zen.
Beste hitzordu bat ere finkatu dute aurten, izan ere, hilaren 11n (asteartea) Un hombre llamado florde otoño filma emango dute Niessen Zinematan 19:30ean.
LGTBI kolektiboak eskutan du adreilua 50 urte geroago, Stonewallgo erreboltaren hasiera izan zen adreilu hura, eta etorkizun berri bat eraikitzeko prest dago.
