Gazteei zuzendutako teknifikazio saioak antolatuko ditu Donibane Eskubaloiak
Donibanen eskubaloi eskola bat martxan jartzeko helburua du taldeak. Hilaren 11 eta 13an egingo diren teknifikazio saio irekien bidez gazteak erakarri nahi dituzte, talde eta kirolaren nondik norakoak ezagutaraziz.
Donibane Eskubaloia kadete mailako jokalariak 2019ko apirilean. Eskubaloiak ibilbide luzea egin du Pasai Donibanen, ia 60 urte. Baina gaur egun, gazteenek inguruko herrietara joan behar dute eskubaloian jolastera, Donibanek ez baitu azpiegiturarik haurrekin entrenatzeko. Zuzendaritzak hausnarketa egin ostean, funtsezkotzat dute eskubaloi eskola bat sortzea eta nesken parte hartzea bultzatzea. Hurrengo denboraldiari begira, alebin eta infantil mailako taldeak osatu nahi dituzte. Pasaiako Udaleko Kirol Sailaren eta Pasaia Lezo Lizeoaren laguntza jasoko du egitasmoak.
Teknifikazio saio irekiak egingo dituzte hilaren 11 eta 13an Donibaneko Kiroldegian, 17:00etatik eta 18:00etara. Lehen Hezkuntzako 5. eta 6. mailako eta DBHko 1. eta 2. mailako gazteei daude zuzenduak. Orain arte harrera ona izan dute, aurreko astean egindako saioetan, 17 eta 25 lagun bildu ziren hurrenez hurren.
