Izaskun Gomez izango da Pasaiako alkate
PSEk eta EAJk aginte akordioa lotu dute. Izaskun Gomez izango da Pasaiako alkatea 2019-2023 legealdian, jeltzaleen babesarekin.
PSEko Izaskun Gomez Pasaiako alkatea izango da EAJren babesarekin. Atzo jakinarazi zion Nahikari Oterminek HITZAri negoziatzen ari zirela Pasaiako EAJ eta PSE, eta aukera guztiak mahai gainean zeudela. Azkenean ados jarri dira bi aldeak eta Izaskun Gomez izango da alkate berriz ere, hautagai bozkatuena izan ez arren. Bihar goizean hartuko du agintea. 2003-2007 agintaldian, nahiz aurrekoan ere alkate izandakoa da Gomez. Hirugarrenez gidatuko du herria, beraz, udaletxetik.
PSE-EEk eta EAJk HITZAra bidalitako oharraren arabera, gaur eguerdian itxi dute akordioa, biharko alkate izendatze eta udalbatza eratze udalbatzarra baino 24 ordu eskas lehenago. “Akordioak ahalbidetzen du bi alderdiek udalbatzan gehiengo osoa izango dutela, eta Izaskun Gomezentzat izatea alkatetza”. Alkatetzarako bakarrik ez. Akordioa gobernagarritasun eremurako ere bada, bi alderdiek “era koordinatuan eta leial lan egiteko” konpromisoa hartu dute, “gobernu programa bat egikaritzeko”. Gainera, udalbatzarretan eta batzordeetan ere elkarlana izango dutela ardatz jakinarazi dute PSE-EEk eta EAJk, “horietan izango diren ekintzak eta erabakiak babestuko dituzte, udaleko ohiko jarduera bateratua izango da”.
Ezjakintasuna zen nagusi azken egunotan, inork ez baitzekien zein norabide hartu zuen alkate makilak. PSEko Eneko Anduezak adierazitakoren arabera, haiek ez zuten hautagairik aurkeztuko jeltzaleen babesa izan ezean. Aginte akordioa lortuta, eskatutako egonkortasuna emango dio Oterminek Gomezi.
Azken orduotan EH Bilduk elkarrizketa eta akordiorako deia luzatu die Pasaiako udalbatzaren parte izango diren alderdi guztiei. Junkal Mintegia, hauteskundeen irabazleak, politika egiteko modu berri bat egiteko zetorrela adierazi zuen. Akordioa oinarri dutela, Pasaiak bizi duen egoera larriari elkarlanean aurre egiteko proposamenarekin zuzendu zaie EH Bildu, beste indar politikoei. PSEk eta EAJk, ordea, ez dute erantzunik eman, eta biren arteko akordiora mugatuko dute agintea.
