Oarsoaldeko langileen lehen hautua da LAB sindikatua
Hauteskunde sindikalen balorazio oso positiboa egin dute LABko ordezkariek. Eskualdeko ordezkaritzen %37,55a lortu ditu sindikatu abertzaleak.
LABko zenbait kide eta ordezkari, Xenpelar plazan egindako agerraldian. Oarsoaldeko langileek aldaketa sakon baten aldeko boza eman dutela berretsi du LABk. Txikitasunetik handitasunera lan eginez, “bizitzak erdigunean” jarri dituzte, eta langileen garaipentzat jo du sindikatuak.
Ordezkarien %37,55a eskuratu dituzte eta goranzko joera nabaria izan da hainbat enpresa eta udaletan. Errenteriako Udalaren kasua nabarmentzeko modukoa da, LABek ordezkaritza ia laukoiztu baitu. Zazpi ordezkari izango dituzte udaletxean, 2014ean baino bost gehiago.
Beissier eta XPO enpresetan bost ordezkari izango ditu sindikatuak, duela 4 urte baino bi gehiago. Nakulasen ere bi ordezkari gehiago irabazi ditu, orotara 3hiru izango dira enpresan. Urkabe eta Calplast enpresetan LABk ordezkari bat gehiago lortu du.
Enpresa horietan guztietan LAB da sindikatu nagusia. Alcampon, 2014 emaitzei eutsi diete, 2 ordezkari.
Klase ikuspegi feminista eta herrikoi batetik antolatuz, eragin handia du sindikatuak Oarsoaldean. “Eredu aldaketaren alde” eskari zehatzak egin dituztela adierazi dute eskualdeko ordezkariek: 1200 euroko soldata, 35 orduko lan jarduna, edozein motatako diskriminazioaren kontra egitea, lanetik etxera bizirik iristea eta langileek bere kabuz erabakitzeko marko kolektibo eta propioa edukitzea.
Lan arloan bezala, politikagintzan Oarsoaldeko langileek hartutako erabaki progresistaz “harro” da LAB, ezker subiranistak lortu du gehiengoa lau udalerrietan. Langileen eskubideak eta politikoak lotuta doazela diote, LAB izan baita irabazlea eskualdeko udal guztietan.
Emaitza onak jasota, LABk argi du bide orria; langileriaren batasunak emandako indarretik, inboluzio ekonomikoaren kontra egingo duen, Euskal Herri eraldatzailea nahi dute.
