Pasaiako lau estropadekin indartsu hasiko da traineruen sasoia
Bihar eta etzi KAE1eko eta ETE Ligako bina estropada egingo dituzte badian. KAE2koek Lutxanan ekingo diote lehiari, igandean. Hurrengo asteburuan, Eusko Label Ligaren txanda.
Etxean jokatuko dute San Juanen traineruek asteburuan. Argazkia: Josu Z. Iratzargailuak goizean goiz jotzen duenean bezala izango da. Bapatean, Pasaiako eta Oarso Bidasoko arraunzaleak ia lozorroan daudenean, lau estropada asteburu batean Pasaiako badian, to! A zer lehen kolpea. Izan ere, Kantauriko Arraun Elkartearen (KAE) lehen liga, eta Emakumeen Traineru Elkartearena (ETE) Pasaiako badian hasiko dira, bina estropadarekin bihar eta etzi. Antolakuntzaren ardura San Juan-Koxtapek du. Sanjuandarrek badute esperientzia handia traineru lehiak antolatzen, eskerrak.
KAE1 Ligako biak biharko 12:00etan eta etziko 12:30ean izango dira, III. Fegemu eta III. Adegi banderak hurrenez hurren. Liga horretako hamabi traineruen artean daude San Juan eta Hibaika. Eta normala denez, biek ala biek nahiko dutena da egoki, ondo, sasoiko hasi liga. Lehen asteburuan puntu asko izango dituzte jokoan biek, hasierako lehiak ez daitezela zama izan abuztu bukaeran. San Juanek ligako goiko postuetan egon asmo du, agian, igoerari hozkada emateko. Hibaikak, aldiz, urrun utzi nahi ditu beheko lekuak.
ETE Ligaren barruan ere, bi lehia. Biharko I. Igartza bandera 11:30ean hasiko da, igandeko Emakumeen I. Adegi bandera bezala. Maila horretan —emakumeen bigarren maila— Hibaika eta San Juan ariko dira, garai bateko lehia historikoak beste era batera biziz. Hibaika indartzen, San Juan ia hutsetik hasten Batelerak ontzi guztiz eraberrituarekin. Hibaikak batez ere goian egoteko aukera garbiak ditu.
KAE2, Lutxanan
KAE2k ere asteburuan hasiko du liga, 11 trainerukoa. Bertan daude Hondarribiaren eta San Juanen B ontziak. Igandean da Lutxanako (Bizkaia) lehia, ligako lehena. Harrobiko taldeak dira berdea eta arrosa, hortaz,
bi ontzi horien helburua garbia da: lan txukuna egin udan zehar, eta bide batez, arraunlariak formatu.
Liga handienak aurrerago hasiko dira. Eusko Labelen lehenak hilaren 22an eta 23an dira, Bilbon eta Zierbenan: Hondarribia eta San Pedro daude bertan, iaz baino traineru bat gutxiago, beraz. EuskoTren, berriz, hilaren 29 eta 30an abiatuko da, Santanderren eta Lekeition egingo diren lehietan. Horretan ere San Juan falta iaztik.
